Зæрдæйы аивады апп куы уа, уæд йæ афоныл тала суаддзæн. Афтæ рауад Челæхсаты Софияимæ дæр. Нывкæнынады ахуыртæм никуы цыд, райста медицинон дæсныйад. Фæлæ йæ зæрдæ гыццылæй дæр аивадмæ æхсайдта. Рæстæг æрцыд, æмæ йæ саби бонты бæллиц сæххæст кодта. Абон София у æрыгон нывгæнæг. Уыдис ын фыццаг равдыст дæр. Нæ программæ «Æрмадз»-ы нын йæхи дæнцæгæй равдыста, курдиаты фæндыл цæуын кæй хъæуы, уый.

Дзалаты Альберт зæрингуырд у йæ зæрдæйы фæндонмæ гæсгæ. Лæмбынæг æмæ лыстæг куыстæн æнцонæй быхсы, стæй йæ уарзы. Йæ ныхæстæм гæсгæ, æхца бакусын сæйрагдæр нæу. Æхцондзинад ын хæссынц, цы рæсугъд дзаумæттæ саразы, уыдон.

Ныртæккæ бирæтæ кусæг дæсныйæдтыл стырзæрдæ систы. Электриктæ, аразджытæ, æндадзджытæ æмæ механиктæ адæммæ кадджын нал кæсынц. Фæлæ Гокъоты Сергей сфæнд кодта æндадзæгыл сахуыр кæнын æмæ иу хатт дæр нæ фæфæсмон кодта.

Гугкаты Темболат йæ дæсныйадмæ гæсгæ инженер-электрик у. Фæлæ йæ зæрдæ дизайнеры куыстмæ ахсайдта. Цалдæр азы æндæр горæты фæцарди, фæлæ фæстæмæ Ирыстонмæ ссыди. Йе сфæлдыстады зынгæ бынат ахсы национ темæ. Æмæ уыцы хъуыддаг бæтты, адæмы зондахаст хи культурæ базонынмæ кæй тырны, уыимæ. Йæ куысты æмæ нын йæ зæрдæйы сусæгдзинæдтæ раргом кодта нæ программæйы.

Хъуылаты Динæ гыццылæй нырмæ хуыйын тынг уарзы. Фæлæ йæ цард искуы уыцы дæсныйадимæ сбæтдзæн, уый æнхъæл нæ уыдис. Цæмæй хуыйын фылдæр сылгоймæгтæ сахуыр уой, уый тыххæй та ма сæрмагонд проект дæр æрхъуыды кодта.

Дауыраты Ацæмæз нывæфтыдтæ кæныны фæрцы ‘взары йe сфæлдыстадон тыхтæ. Нывгæнæгыл сæрмагондæй никуы ахуыр кодта, фæлæ йæ уыцы дæсныйад йæхимæ æрбалвæста. Канд графикæйы хуызы нæ, фæлæ хъæдæрмæгæй арæзт дзаумæттæ дæр барæсугъд кæны нывæфтыдæй. Ӕхсызгонæй уæ зонгæ кæнæм йемæ.

Нæ равдысты хъайтар у Тауаситы Ким. 40 азæй фылдæр кусы хъæдӕрмӕгимӕ, 5 азы бæрц та студенттæн амоны уыцы дӕсныйады сусæгдзинæдтæ. Не сфӕлдыстадон къордӕн дӕр дзы иуӕй-иутӕ раргом кодта. Телепроект «Æрмадз»-ы ног равдысты уын сӕ мах та хӕссӕм уӕ размӕ.

Кукла сывæллонæн йæ хорз лымæн у. Цард хъазæны æмæ хъазты фæрцы хуыздæр фембары. Уымæн йæ зæрдæмæ хæстæг айсы йæ уарзон куклайы дæр. Уæлдайдæр сын адæймаджы миниуджытæ куы радтай æмæ сæ театры актёртæ куы рауайа, уæд. Арфæйаг сты, сабийы цард чи аив кæны, уыдон. Арæхстджын адæймаджы къухты та цъылинаг, хæсгард, кърандæстæ æмæ алыхуызон æрмæджыты руаджы равзæрынц фидæны артисттæ – куклатæ.

Не сфæлдыстадон къорд бахæццæ ис Хуссар Ирыстонмæ нæ программæйы хъайтарты фæдыл. Нæ радон рауагъды ис дыууæ архайæджы: скульптор Кæсæбиты Андрей æмæ нывгæнæг Къадзты Вадим.

Ныртæккæ Валер райсомы фараст сахатæй изæры æхсæз сахатмæ вæййы йæ æрмадзы. Ам удæнцой райсы. Дзауматæ аразгæйæ арæх йæ хъуыдыты ацæуы, æмæ йæ зæрдæйы алыхуызон æнкъарæнтæ раргом кæны. Арæхдæр баст вæййынц фыдæлты фарн æмæ æгъдауимæ. Валер тынг æнувыд у ирон культурæйыл, æмæ йæ зæрдæ риссы, ирæтты удварны хæзнатæм куыдфæндыйы цæстæй кæсын кæй байдыдтой, ууыл.