Хæххон фæндæгты уавæр, Ног азы хи хъахъхъæныны мадзæлттæ, «Стыр ныхас»-ы фæсивæдон комитет, сфæлдыстадон равдыст æмæ цæрæгойтыл æнувыд саби

Сымах та куыд нымайут, Ног аз раздæр кæцы бæстæмæ `рбацæуы? Дызæрдыг кæд кæнут, уæд уын мах ратдзыстæм бæлвырд дзуапп. Зæгъдзыстæм ма, бæрæгбон фыдбылызмæ цæмæй ма расайа, уый тыххæй дæр. Нæ уазæг уыдис æнæнхъæлæджы цауты разамынды минæвар. Афтæ ма дзырдтам Ирыстоны хохаг фæндæгты тыххæй. Сты æркæсинаг. Сæ уавæр куы фæхуыздæр уа, уæд уый пайда уыдзæн республикæйы райрæзтæн. Уæдæ ма уæ ахондзыстæм, Национ музейы цы равдысты байгом уыдзæн, уырдæм. Йæ авторимæ нын рауад зæрдæмæдзæугæ ныхас. Студимæ нæм саккаг кодтой, «Стыр Ныхас»-ы фæсивæдон комитеты ног уæнгтæ дæр. Дзырдтам, ирон царды бындур цы у, ууыл — æгъдауыл. Программæйы кæронбæттæны та нæм сæмбæлд чысыл «кæркгæс». Афтæ нæ бон зæгъын у, æнахъом уæвгæйæ, хæдзарон цæрæгойты зæрдиагæй чи уарзы, нæ уыцы уазæг сабийæ.