Алагиры районы социалон лæггæдты центр æххуыс кæны ацæргæ адæмæн. Се ‘хсæн Фыдыбæстæйы Стыр хæсты æмæ фæллойы ветерантæ, Уæрæсейы сгуыхт ахуыргæнджытæ. Æххуысхъуаг пенсиисджынтæ фыссынц курдиæттæ, æмæ сæм центры кусджытæ уайтагъд ацæуынц. Сæ бæрны цы ацæргæ адæм ис, уыдонимæ карантины рæстæджы куыст куыд цæуы, ууыл æрныхас кæндзыстæм Алагиры районы социалон лæггæдты центры ацæргæ адæмæн социалон æххуыс кæныны хайады сæргълæууæг Тасойты Фатимæ æмæ Алагиры районы социалон лæггæдты центры социалон кусæг Бесолты Фатимæимæ.
Хицауады сæрдар Михаил Мишустин абон фехъусын кодта: бархионтæн- дохтыртæн радих кæнын 242 милуан сомы субсидитæн. Сæ архайд сын нымайы раст æма хорзыл.
Бархионтæ сæхиуыл нæ ауæрдгæйæ кусынц Цæгат Ирыстоны дæр. Ацы зын рæстæджы бархионтæ æххуыс кæнынц, сæ бон хæдзарæй рацауын кæмæн нæу, æмæ зындзинæдтæ чи æййафы, уыцы ацæргæ адæймæгтæн. Сæрмагонд мадзæлттæ арæзт цæуынц коронавирусæй сæ бахъахъхъæныны тыххæй. Бархионты штабмæ ис бадзурæн æмæ курдиат ныууадзæн фæлхасадон продукттæ, кæнæ та хостæ баласыны тыххæй.
Хæдзæрттæм ацæуыны агъоммæ бархионтæ сæ тæвд сбарынц, скæнынц мæскæтæ æмæ æрынкъухтæ. Абоны онг уал пенсиисджытæн баххуыс кæнын кæй фæнды, уыцы бархион организацитæ сты цалдæр. Уыдонæй иу хуыйны «Большое сердце».
Бархионтæ сидынц нæ республикæйы цæрджытæм: кæд исчи ветеранты æмæ æвæгæсæг ацæргæ адæймæгты тыххæй зоны, уæд æвæстиатæй дзурой мæнæ ацы номырмæ: 8 800 2003 411. Акцийы тыххæй æрныхас кæндзыстæм ацы изæр дæр. Абон не студийы уазджытæ сты бархионтæ Дарчиты Марат æмæ Хамихъоты Алан.
