Фæстаг азты тынг хъæугæ æмæ агургæ сси къамисæджы куыст. Уый баст у, социалон хызтæй парахатæй пайда кæнын кæй райдыдтам, уыимæ дæр. Адæмы фæнды, цæмæй сæ аивæй æмæ амондджынæй уыной. Æмæ бацагурынц хорз къамисæджы. Уæдæ цавæр зонындзинæдтæй æмæ кусæнгæрзтæй хъуамæ уа гæрзифтонг къамисæг, цæмæй йе сфæлдыстад зæрдæмæдзæугæ уа, уый тыххæй?

Ивгъуыд азы кæрон нæ республикæйы хатдзæгтæ скодтой бынæттон хиуынаффæйады оргæнты куыстæн. Нæ равдысты базондзыстæм, Кировы районæн дзы цы аргъ скодтой, стæй дзы цы ног цаутæ æрцыд, уыдон дæр.

Ирон адæмы уарзондæр бæрæгбæттæй иу у Ногбон. Фынгмæ-иу бинонтæ сæхи рагацау цæттæ кодтой. Уæдæ æгъдаумæ гæсгæ, мах дæр нæхи æнæ æртхуронæй æмæ дедатæй нæ ныууагътам. Куыд кæнгæ сты, стæй æртхуронæй кæмæ цы æрхауд? Уый та базондзыстут нæ равдысты.

Ног аз куыд арвитай, афтæ ахæсдзæн æнæхъæн афæдз дæр! Мах бацархайдтам, цæмæй бæрæгбоны агъоммæ уæ рæстæг хъæлдзæгæй арвитат, ууыл. Программæ «Сæумæрайсом»-ы амонджытæ боныцъæхты фестадысты æмæ уын бацæттæ кодтой сæрмагонд рауагъд Ног азмæ!

Алы адæмыхæттæн дæр йæхи истори ис. Вазыгджын у уыцы историйыл узæлын. Нæ фыдæлтæ нын цы культурон бынтæ ныууагътой, уыдон абарæн ис хæзнатимæ. Не студийы уазджытимæ дзурæм нывгæнæджы сусæгдзинæдтыл æмæ Ирыстоны музыкалон аивадыл.

Абон у кинойы бон. Ирыстоны та аивады ацы хуызæн арф уидæгтæ ис. Не студийы дзурæм, кæддæр нæ республикæйы цы кинонывтæ ист æрцыдысты, уыдоныл. Уыимæ ма не `ргом аздæхтам ног информацион технологитæм.

Ирвæзынгæнджыты куысты ахуыргонд куыйтæ ахсджиаг бынат ахсынц. Уæлдайдæр та зымæгон хæхбæсты зæйтæ куы сарæх вæййынц, уæд дзы цыппаркъахыг æххуысгæнджытæн æмбал нæ вæййы! Ирвæзынгæджытимæ æмгуыст кæнынц бархионтæ дæр. Æмæ уыдонимæ дзурæм нæ равдысты.

Адæм тырнынц иннæ бæстæтæ фенынмæ. Ныртæккæ бирæты цымыдис кæнынц Кавказы республикæтæ. Ацы аз бæлцæттæ уæлдай æхсызгонæй цæуынц нæ регионмæ. Уæдæ куыннæ сты вазыгджын, цы фысымуæттæ равзарынц, уыдоны уавæртæ?! Æрæджы специалисттæ раиртæстой, кæмæн сæ цал стъалыйы лæвæрд æрцæудзæн, уый.

Ацы адæмæн арв – сæ дыккаг хæдзар. Æмæ, зæгъынц, иу хатт арвы хъæбысы чи аныгъуылд, уый йæм тырндзæн ногæй. Уæдæ нæ программæйы уазджытæ сты уæлдæфон æфсæдты службæгæнджытæ.

Сæ профессионалон бон бæрæг кæнынц Пенсион фонды кусджытæ. Цавæр хатдзæгтимæ йыл æмбæлынц, æмæ пенсиисджытæн ныфс цæмæй æвæрынц? Уый базонынæн нæ студимæ æрбахуыдтам Уæрæсейы Пенсион фонды кусæджы. Стæй ма нæ программæйы бæлвырд дзурæм, афæдз дыууæ хатты чи `рцæуы, уыцы æрдзон фæзындыл – зымæджы хурхæтæныл. Адæм æм æнхъæлмæ кастысты незамантæй фæстæмæ.