Ис ахæм дæсныйæдтæ, æмæ сæ амонын никæмæн хъæуы. Ис та, сæ куыст кæмæн нæ зыны, ахæмтæ дæр. Сæ фæллой ахады канд сæхиуыл нæ, фæлæ ма æнæнхъæн зæххы къорийы æрдзыл дæр. Специалистты куысты ахадындзинадыл дзурæм нæ студийы. Равдисдзыстæм-ма уын, хæдзары къафеттæ куыд скæнæн ис, уый дæр.

Дельфиаг хъæзтытæ Уæрæсейы кæнын райдыдтой 1999 азы. Ирыстоны минæвæрттæ дзы фæстаг 20 азы дæргъы сызгъæрин майдан фыццаг хатт райстой. Нæ программæйы архайджытæ ма радзурдзысты хъæбынты тыххæй дæр. Абон нæ бæстæйы бæрæг кæнынц ацы хæрзад хæринаджы бон.

Хорздзинад ракæнынæн бирæ нæ хъæуы, адæймаг та йæ цæрæнбонты йæ зæрдыл бадары. Абон у хæлардзинады бон. Æмæ нæ студимæ æрбахуыдтам кадджын доноры æмæ æрыгон бархионты. Хорздзинад ракæнынмæ уыдон кæддæриддæр цæттæ вæййынц.

Дзæуджыхъæуы байгом уæлæмхасæн ахуырадон центр. Ахуыр дзы кæндзысты æххуысхъуаг бинонты сывæлæтты. Центры куысты тыххæй дзурæм не студийы. Сæмбæлдыстæм нæ уазджытыл Комгæронæй дæр. Цавæр сгуыхтдзинæдтæ æфты сæ къухы хъæуы сывæллæттæн бынæттон аивæдты хæдзары? Уый тыххæй та нын сæхæдæг радзырдтой.

Раздæр-иу арæх уыдис фехъусæн, зæгъгæ медицинон кусджытæн аккаг аргъ нæ кæнынц. Фæлæ уавæр аивта, ног хæцгæ низ йæхи куы равдыста, уый фæстæ. Уæлдай бæрнондзинад та æвæрд вæййы операцион медицинон хотыл. Абон бæрæг кæнынц сæ профессионалон бон. Сæ бæрæгбон у аэрофлоты кусджытæн дæр.

Рагæй-æрæгмæ дæр адæймаджы царды бинонтæ скæныны цау фæахсы тынг стыр бынат. Алы адæмыхатт дæр дзы бавæры бындурон нысантæ. Фæлæ, зæгъæм, ирон чындзæхсæвмæ сындæггай хæссын райдыдтой æцæгæлон æгъдæуттæ. Ивддзинæдты тыххæй дзурæм нæ уазджытимæ. Уæдæ ма æрныхас кæндзыстæм кинокамерæйыл дæр. Абон у йæ фæзынды бон.

Æвæццæгæн, аргъæуттæ чи нæ уарзы, ахæм адæймаг зын ссарæн у! Адæмон сфæлдыстады ацы хуыз уарзон у æппæт адæмæн дæр. Фæлæ цымæ сывæллæттæ раздæрау зæрдæргъæвд сты аргъæуттыл? Уый тыххæй æрныхас кодтам нæ уазджытимæ. Уæдæ гитарæйы зæлтæ кæй зæрдæ нæ бацагайдзысты, ахæм та бынтон зын ссарæн уыдзæн. Цымæ цавæр бастдзинад ис се `хсæн? Аргъæутты бон дæр æмæ гитарæйы бон дæр бæрæг кæнæм 11-æм февралы.

10-æм февралы æппæт дунейы дæр бæрæг кæнынц, хоры æмæ хъæдуры мыггагмæ цы зайæгойтæ хауынц, уый бон. Цæмæй нартхоры, хъæдуры æмæ æндæр хус гагаты ахадындзинад фæкадджындæр уа, уый тыххæй бирæ бæстæты алы аз дæр сбæрæг кæнынц ацы бон. Зайæгойты ахадындзинады тыххæй дзурæм нæ программæйы. Уымæй уæлдай ма бирæ цымыдисаг хабæрттæ базондзыстут бынаты хицауы тыххæй. Уый бон дæр абон бæрæг кæнынц.

Дæндаджы рыстæн, зæгъынц, арс дæр нæ фæразы. Фæлæ бæрæггæнæнтæм гæсгæ, уæрæсейæгтæн æрмæст сæ 30% ацæуынц дæндæгты дохтырмæ. Афтæмæй та нырыккон технологиты фæрцы дохтырты куыст дзæвгар фенцондæр. Уæдæ, цы ахады дæндæгты низтыл, уый тыххæй дзурæм нæ программæйы. Стæй ма æвдисæм, сæумæрайсом пиццæ тагъд куыд афыцæн ис, уый дæр. Æмæ хуымæтæджы нæ! Абон дунейы бæрæг кæнынц пиццæйы бон.

Ацы аз нысангонд арцыд наукæйы æмæ ног технологиты афæдзыл. Ирыстоны кæстæртæ рагæй-æрæгмæ дæр наукæйы уæндон къахдзæфтæ кæнынц. Уымæ гæсгæ, ацы равдысты æрныхас кæндзыстæм æрвылазон конкурс «Фидæнмæ къахдзæф»-ыл. Уымæй уæлдай ма абон у риелторы бон дæр. Сæ куысты сусæгдзинæдты æмæ зындзинæдты тыххæй нын радзурдзæн нæ студийы уазæг.