Вейпты ныхмæ архайд, социалон кусæджы бон æмæ сфæлдыстады галуаны цалцæг I Йæ рæстæгыл

Электрон тамакотæ дымын чи уарзы, уыдон фæздæг, гæнæн ис, æмæ къаддæр райдайдзысты уадзын. Закъоны бындурыл ахæм уынаффæ рахæссыны хъæппæрис бахастой Уæрæсейы Паддзахадон Думæмæ. Цы куыст ыл цæудзæн, ууыл аныхас кодтам нæ студийы уазджытимæ. Афтæ ма нæм йæ рæстæгыл фæзындысты, 8-æм июны йæ профессионалон бæрæгбон кæмæн у, уыдон — социалон кусджытæ. Бирæтæм ныр дæр ма сæ фæллой бынтон ахсджиаг нæ кæсы. Фæлæ ма дзы, фæкæсын кæмæ хъæуы, æвæгæсæгæй чи баззад, уыдоны афæрсут. Арæх сын социалон кусджытæ свæййынц хи бинойнæгты хуызæн. Мах зæрды дæр сын æрæфтыд бузныг зæгъын. Программæйы æртыккаг хайы та дзырдтам, бирæ фæлтæртæ кæм хъомыл кодтой сфæлдыстадон æгъдауæй, уыцы куыстуаты юбилейыл. Йæ истори райдыдта суанг Советон Цæдисы заманты. Æмæ нæ дуджы дæр йæ куыст не `рмынæг. Уазæгуаты нæм уыдысты Сывæллæтты сфæлдыстады Галуаны кусджытæ.