Цæгат Ирыстон æмæ Кæсæг-Балхъар иумæ кусджысты социалон-экономикон къабазы рæзтыл. Бæлвырд мадзæлттæ аразын бахæс кæндзысты кусæг къордæн. Йæ сæргъы уыдзысты дыууæ республикæйы хицауадты сæрдартæ Тускъаты Таймураз æмæ Алий Мусуков. Ахæм хатдзæгтæ скодтой абон Битарты Вячелав æмæ Юрий Коковы фембæлды рæстæг. Дыууæ регионы разамонджыты ныхæстæм гæсгæ, уый æмгуыстадæн ахсджиаг уыдзæн. Уымæй уæлдай ма, Цæгат Ирыстоны уыдзысты Кæсæг-Балхъары культурæйы бонтæ. Сыхаг республикæйы цæрджыты та базонгæ кæндзысты Ирыстоны культурæимæ. Цæгат Ирыстон æмæ Кæсæг-Балхъары разамонджытæ ма æрдзырдтой фидæны иумæ цы проекттыл кусджыты, ууыл. Бахастой сæм туризм, хъæууон хæдзарад æмæ промышленнон къабæзтæ.
Юрий Коков уыди нæ республикæйы национ музейы дæр. Уым ын радзырдтой музей куыд сæвзæрд, уый тыххæй. Байгом æй кодтой бындурон цалцæджы фæстæ. Юрий Коковæн равдыстой сæрмæтты æмæ аланты кульутрæйы, археологон къæхтыты рæстæг цы дзаумæттæ ссардтой, уыдон, стæй номдзыд нывгæнджыты куыстытæ. Уый фæстæ, Битарты Вячеслав æмæ Юрий Коков æрзылдысты Сабырдзинады проспектыл. Бацыдысты Цæгат Ирыстоны гуманитарон æмæ социалон иртæстыты институтмæ. Уым федтой стæм чингуыты æмбырдгонд. Институты кусджытæ уазджыты æргом аздахтой Кæсæг-Балхъары республикæ æмæ Цæгат Ирыстоны историон æрмæджытæм. Уыимæ ма, Юрий Коков æмæ Битарты Вячеслав уыдысты Беслæны амæттæгты уæлмæрды. Иумæ сæвæрдтой дидинджытæ Хъыджы бæласы цур.
