1987 азы дзæбæхгæнæн æмæ педиатрийæйы фыццæгæм курсы студенттæ. Уæд нырма Цæгат Ирыстоны Паддзахадон медицинон академи хуынд институт, факультеттæ та дзы уыд æрмæстдæр дыууæ. Уæды фæсивæд хорз хъуыды кæны уыцы рæстæг.
Кæрæдзиимæ æфсæрмы кæнгæйæ куыд зонгæ кæдтой, уый. Фæстæдæр сæ рауад æцæг командæ. Сæ ахуыры рæстæг сын æппæты зындæр уыд райдианты. Анатомийы лекциты куыд фæстиат æмæ катай кодтой, уый хорз хъуыды кæнынц.
” Анатомийы лекцитæ нын каст Толпарты Байкал, æмæ мын иу алы хатт дæр дзырдта Цæллагон, зонындзинæдтæ дæм нæй, зæгъгæ. Уæдæ бафæлвар æмæ йæ лекцимæ æнæ чиныгæй кæнæ æнæ атлæсæй æрбацу. Афтæ дæр иу рауад æмæ нæ уый тыххæй лекцийæ дæр арвыста. Стæй иу æм хъуыд ногæй æрбацæуын æрмæг радзурынмæ, хатгай-иу æхсæвыгæдтæм дæр баззадыстæм. Уыцы рæстæг мобилон хæтæлтæ нæ уыд. Институты цы стационарон телефон уыд, уырдыгæй иу бадзырдтам нæ ныййарджытæм æмæ иу сын загътам кæй фæстиат кæнæм, уый”.
Ахуыры азтæ æрхъуыды кæнынц сæ мидбылты бахудгæйæ. Уыдон уыдысты сæ æвзонгдзинады бонтæ. Урс колпакты студенттæ кустой бирæ. Æндæр хуызы адæм дзæбæхгæнæн нæй. Чиныгдон афтид никуы уыд. Кæсæн залы иу студенттæ рады лæууыдысты. Алкæйы дæр сæ фæндыд йæхицæн куысты бынат бацахсын æмæ чиныгæн конспект скæнын. Сæ рауагъдæй рацыд 40 азы. Раст уый бæрц рæстæг рацыд Ирина Галикаева йе ‘мкурсонты фæстаг хатт куы федта, уæдæй. Райуæрстмæ гæсгæ сылгоймаг ацыд Сыбырмæ кусынмæ.
” 40 азы фæстæ, ме ‘мбæлтты фенын мæнæн у тынг æхсызгон. Мæ зæрдæ цинæй байдзаг. Иумæ бирæ рæстæг æрвыстам. Кæмттæм дæр иу ацыдыстæм, афтæ дæр уыд æмæ иу искуы дæр абадтыстæм. Сæ фылдæримæ 40 азмæ бастдзинад нæ фесæфтам æмæ кæд бирæ рæстæг рацыд уæддæр сæ уайтагъд баззыдтон. Нæ баивтам, нæ удтæ нырма æрыгон сты”.
Цы радзурой, уый сын ис. Хæрзбон кæрæдзийæн загътой куыд æрыгон специалисттæ, ахуыргæнæндоны та фембæлдысты куыд Медецинон наукæты доктортæ æмæ кандидаттæ, доценттæ, профессортæ, Уæрæсейы, Цæгат Ирыстоны æмæ нæ бæстæйы иннæ регионты сгуыхт дохтыртæ. Къабазы æнтыстджын систы сæ ахуыргæнджыты фæрцы.
Сæ фылдæр сæхæдæг ныртæккæ лекцитæ кæсынц медицинон академийы. Кусынц сæ ахуыргæнджыты дæнцæгмæ гæсгæ. Студенттæн зонындзинæдтæ раттын æнцон хъуыддаг нæу, фыццаг уал сæ сцымыдис кæнын хъæуы. Кæмдæр та баххуыс кæнын. Татраты Алыксандр йæ студентты ахуыр кæны, куыд ын амыдтой афтæ. Медицинон академийы хуыздæр традицитæм гæсгæ.
1984 азы на медицинон академийы дзæбæхгæнын факультетæй рауагътой 14 къорды, 8 та педиатрийæйæ. Æмткæй 230 адæймаджы. Уыдонæй 25 сырх дипломтимæ. Цымыдисаг та уый у, æмæ ацы аз кæй фембæлдысты. Уымæн æмæ сæ Медицинон академийыл дæр ныр сæххæст 85 азы.
