Уазæлтты рæстæг æхснырсæг сарæх вæййы. Уый тыххæй хъæуы æнæнидзинад хъахъхъæнын. Профилактикæмæ куыд фæндыйы цæстæй кæсæн нæй. Æмæ дзырд афæдзы алы афонты цы низтæ сарæх вæййынц, уыдоныл нæу. Цæгат Ирыстоны дарддæр активонæй цæуы сывæллæтты вакцинаци полиомелитæй. Вирус арæхдæр бахъыгдары астæуы магъз æмæ расайы параличмæ. Фылдæр тæссаг у 5 азы онг кæуыл цæуы, уыцы сабитæн.
Афтæ цыппæрæм поликлиникæйы цæуы полиомиелитæй ревакцинаци. Æхсæзаздзыд Тамерланæн у кæройнаг. Ныридæгæн фидарæй зæгъæн ис йæ иммунитет кæй фæхъæддыхдæр, уый.
Полиомиелит нырвыты системæ æххæстæй хъыгдары. Йæ бон у параличмæ расайын, кæнæ рæуджыты куыст бауромын. Низ фæзыны энтеновирус кæй хонынц, уый фæстæ. Арæхдæр рабæрæг вæййы 6 азы онг сывæллæттæм.
Полиомиелит рабæрæг кæнæн ис æнæ медицинон ахуырадæй дæр. Йæ миниуджытæ сты буары бæрзонд температурæ, лæмæгъдзинад, фæзынынц ма хæцъæфæлхынцъытæ, къæхтæ æмæ къухты рыст, зын вæййы бæрзæй азилын. Низ рæстæджы афонтæм гæсгæ нæу, йæ бон у, цыфæнды сезоны дæр фæзынын. Ахсджиаг у гигиенæйы хуымæтæг домæнтæ æххæст кæнын. Къухтæ æхсын, хъазæнтæ дезинфекци кæнын, хойрæгтæй сыгъдæгæй пайда кæнын. Сывæллæттæн прививкæ кæнын райдайынц 3 мæйæ фæстæмæ.
Вакцинацийы фæстæ адæймагмæ сæвзæры цæрæнбонты чи ахæсдзæн, ахæм иммунитет. Кæй зæгъын æй хъæуы, сæдæ проценты гаранти нæ дæтты. Фæлæ, прививкæгондмæ куы рабæрæг вæййы инфекци, уæд ацæуы рогдæр хуызы æмæ æнæ уæззау фæстиуджытæй. Полиомиелитæй вакцинæ цы сывæллонæн не скодтой, уый та æппынæдзух хъуамæ уа дохтырты цæстдарды бын.
Алы процедурæйы размæ дæр сывæллæттæм лæмбынæг кæсынц педиатртæ, рафыссынц сын амынддзинæдтæ. Иммунизаци арæзт у 6 вакцинæйæ. Фыццаг цыппар скæнынц агъды уæллаг хаймæ. Фæстаг къæпхæнтæ сты æртæхты хуызы. Прививкæ нæ аразынц, сывæллонмæ иммунодефицит кæнæ аллергийæ куы уа, уæд. Æппынæдзух рынчын чи у, уыцы сывæллæтты та исынц фыццаградон хуызы.
Прививкæйы фæстæ сывæллон фылдæр хатт йæхи хорз фенкъары. Стæм хатт, гæнæн ис, æмæ схиза йæ буары тæвд, нæ фæхауы æртæ боны дæргъы. Фæлæ уым æвзæрæй ницы ис. Æртæ бонæй фылдæр тæвд куы нæ дæлдæр кæна, уæд та ныййарæг хъуамæ бацагура дохтырты æххуыс.
Уæрæсейы вакцинаци у æнæмæнг. Сывæллон йæ рæстæгыл прививкæ куы нæ райса, уæд ын поликлиникæйы аразынц хицæн пълан. Фæлæ вакцинæ скæнын кæй нæ фæфæнды, ахæмтæ арæх нæ разынынц. Ныййарджытæн æппынæдзух дзурынц низ æмæ йæ фæстиуджыты тыххæй.
Æрвылаз 24 октябры бæстæйы бæрæг кæнынц полиомиелитимæ тох кæныны бон. Фæстаг азты, специалистты ныхæстæм гæсгæ, республикæйы низимæ баст цаутæ нæ рабæрæг кодтой.
