Нӕ республикӕйы адӕмон артист, эстрадон зарӕггӕнӕг ӕмӕ музыкант Хуыриаты Валерийы ном рагӕй зындгонд у нӕ аивадуарзджытӕн. Валерий бирӕ азты дӕргъы уыд паддзахадон ансамбль «Алан»-ы оркестры архайӕг. Зындгонд коллективимӕ уыд Уӕрӕсейы бирӕ рӕтты ӕмӕ бирӕ фӕсарӕйнаг бӕстӕты.
Уӕдӕ 80-м азты чи нӕ хъуыды кӕны легендарон ансамбль «Суадон», уымӕн уӕд йӕ кой айхъуыст суанг ма фӕсарӕнтӕм дӕр. Уыцы къорды бындурӕвӕрджытӕй иу уыд Хуыриаты Валерий. Ирон лирикон зарджытӕ, аив цӕгъдтытӕ, рӕсугъд кӕфтытӕ, юмор – концертон программӕ уыд алыхуызон, адӕмы зӕрдӕтӕм тынг цыдис сӕ программӕ.
