300 мин бæласы талайы ныссагътой Цæгат Ирыстоны «Бахъахъхъæнæм хъæд» æппæтуæрæсеон акцийы фæлгæты. Уый тыххæй фехъусын кодта æрдзон æвæрæнтæ æмæ экологийы министрады хъæдтæм цæстдарды хайады разамонæг Тыджыты Ингæ.
Акцийы архайджытæн арфæ ракодта, цъæхфæлысты уавæрмæ куыдфæндыйы цæстæй кæй нæ кæсынц, уый тыххæй. Мадзалы архайдтой æхсæнадон организацитæ, бархионтæ, студенттæ, æмæ хуымæтæг адæм. Бæлæстæ ныссагътой 75 гектары фæзуатыл.
Æппæтуæрæсеон акци сарæзта Уæрæсейы профилон министрад Æрдзхъахъхъæныны æхсæнадимæ иумæ, национ проект «Экологи»-йы фæлгæты, баххуыс сын кодтой æппæтуæрæсеон адæмон фронты уæнгтæ дæр.
