Ацы бонты йæ 80 азы юбилей сбæрæг кодта Уæрæсейы журналистты цæдисы уæнг, газет “Рæстдзинад”-ы хистæр уацхæссæг, раздæры спортивон комментатор Хæмыцаты Морис. Йæ курдиат у алывæрсыг. Бирæ азты фæкуыста республикæйы мыхуыры. Йæ фæндыры зæлтæ дæр аивадуарзджыты зæрдæтæм хъарынц.
Æмæ йæ азтæ та ирд æмæ хъæздыг рауадысты. Хæмыцаты Морис райгуырд Толдзгуны хъæуы. Хъомыл кодта фæзминаг бинонты. Йæ фыд хæстæй ссыд инвалидæй æмæ хæдзары уаргъ æрæнцад хистæр фырты уæхсчытыл. Кæд æппынæдзух фæллой кодта, уæддæр сабийæ мадæлон æвзагæн уæлдай аргъ кодта. Астæуккаг скъолайы фæстæ ахуыр кæнынмæ бацыд Цæгат Ирыстоны паддзахадон университеты филологийы факультетмæ. Каст æй фæцис æнтыстджынæй. Чысыл рæстæг акуыста ахуыргæнæгæй дæр, фæлæ йæ фæндыд хи журналистикæйы дæр бафæлварын. 1981 азы фыццаг хатт æрбацыд “Рæстдзинад”-мæ. Фæстæдæр æй йæ фæндаг акодта радикомимтеты промышленнон хайадмæ, уым фæллой кодта 20 азы. Йæ ном хъуыстгонд у куыд футболон коментатор дæр.
Радиойы хæдзарæй уæлдай ма Хæмыцаты Морис фæллой кодта Хæххон паддзахадон аграрон университеты, мыхуыры уагъта студентты газет “Дружба”. Ныртæккæ кæд пенсиисæг у, уæддæр кусы йæ уарзон “Рæстдзинад”-ы. Мæ хъарутæ цалынмæ амонынц, уæдмæ архайын – зæгъы нæлгоймаг.
Нæ фыдæлты æгъдæуттæ мæ уæнгты ахъардтой, зæгъы Морис. Йæ æрмæджыты уæлдай æргом здахы мадæлон æвзаг хъахъхъæнынмæ, нæ культурæ æмæ традицитæм. Газеткæсджытæ йын йæ æрмæджытæм æхсызгонæй фенхъæлмæ кæсынц. Арæх сæ суазæг кæны газеты редакцийы дæр.
Курдиатджын адæймаг æнтыстджын у музыкалон аивады дæр. Сабийæ фæцалх фæндырæй цæгъдыныл. Хæдахуыр уæвгæйæ йæ цагъды зæлтæ бирæты зæрдæтæм ссардтой фæндаг. Йæ ныхасмæ гæсгæ, ирон зарæг у йæ зæрдæйы хос. Рауагъта музыкалон клип “Ирон цагъд”, зæгъгæ. Хæмыцаты Морисы фыст чингуытæ дæр адæмæн уарзон сты. Мыхуыры йын рацыдысты “Мæ хъæу Толдзгун”, “Повесть о Хазнидоне”, “Под крылом небесной сестры”, йæ мыггаджы историйы тыххæй чиныг, дыууæ та футболон æрмæджытæ.
Цæстуарзон, цардуарзаг æмæ куырыхон хистæр. Йæ зонгæтæ, хæлæрттæ, æмкусджытæ йæ зонынц куыд уæздан, æгъдауджын, зæрдæхæлар адæймагæй. Æмæ уый æппæт хæрзиуджытæй дæр зынаргъдæр у, зæгъы газет “Рæстдзинад”-ы сæйраг редактор Фидараты Юрий.
Кæстæртæн – дæнцæгæн хæссинаг хистæр. Нæ сын æвгъау кæны йæ зонындзинæдтæ æмæ фæлтæрддзинад. Хæмыцаты Морисыл кæд 80 азы сæххæст, уæддæр æм бирæ фæндтæ ис. Иууылдæр ын баст сты мадæлон æвзаг парахат кæнын æмæ фæсивæды хъомыладимæ. Куырыхон хистæр фæдзæхсы кæстæртæн – “царды, æнæмæнг хъæуы стыр нысантæм тырнын”.
Саулаты Аланæ
