Кадджын бæрæгбоныл сæмбæлдысты Мидхъуыддæгты министрады музейы дæр. Фыдыбæстæйы хъæбатырты нæмттæ мысынц алы аз дæр. Ацы бон рæзгæ фæлтæрæн фæаразынц лæгдзинады уроктæ æмæ ветерантимæ фембæлдтытæ. Ахæм мадзал ацыд Архонская станицæйы скъолайы.
Ахуырдзаутимæ фембæлдысты Мидхъуыддæгты министрады кусджытæ. Сывæллæттæ бацæттæ кодтой концертон программæ. Сабитæн радзырдтой Цæгат Ирыстонæй рацæуджыты хæбатырдзинад æмæ куырыхон сгуыхтдзинæдты тыххæй. Барадхъахъхъæнджытæ æмæ скъоладзаутæ иу минут æдзæмæй алæууыдысты. Стæй сывæллæттæ акодтой зарæг «Служить России», зæгъгæ.
Мадзалы архайджытæ æрымысыдысты Уæрæсейы хъæбатыр, пъæлицæйы лейтенант Джыбылаты Зауры рухс ном. Уый 2012 азы йæ хъæбатырдзинад равдыста, террористтæн иунæгæй ныхкъуырд ратгæйæ. Паддзахадон автоинспекцийы кусджытæ, сæ сæргъы сæ хицау Моурауты Таймураз афтæмæй, бабæрæг кодтой Джыбылаты Зауры цыртдзæвæн. Йæ ингæнмæ йын дидинджытæ æрбахастой æмæ йын кад скодтой минут æдзæмæй алæугæйæ.
