Чингуыты дунемӕ дуар гом кӕнынц фыццаг ӕвзонг чиныгкӕсджытӕ. Моделон библиотекӕйы-4-ӕм филиалы абон бирӕ адӕм ис. Уыйбæрц уазджытæ дзы раздæр нæ хъуыды кæнынц. Кусæндон байгом кодтой цалцæггæнæн куыстыты фæстæ.
Чиныгдон бабӕрӕг кодта республикӕйы хицауады сӕрдар Дзанайты Барис дӕр. Бынаты йын скодтой чысыл экскурси. Уӕрӕх кӕсӕн зал ӕрбацӕуджытӕн. Ног мебель-трансформер, нырыккон технологитимæ ифтонггæрзтæ. Ам ма ис лекцитӕ ӕмӕ конференцитӕ аразæн дӕр.
Зонӕ “Сабибонты бæстӕ” — 16 азы онг фæсивæдæн. Ам æрмæст чингуытæ кӕсӕн нӕй, фӕлӕ ма ахъазӕн ис пайдайаг хъӕзтытӕй дӕр. Ацы тыгъдады пъол у интерактивон. Фӕлӕ уæлдай æргом, кӕй зӕгъын ӕй хъӕуы, чингуытæм. Библиотекӕйы Фонд хайгай сног кодтой, абон дзы ис 27 мин экземпляры.
2025-ӕм азы библиотекӕ бахастой национ проект “Бинонтӕ”-мӕ. Ацы аз апрелы бæстыхай цалцӕг кӕнын райдыдтой.
Чиныгдоны ногдзинӕдтӕн аргъ скодтой ӕрбацӕуджытӕ сӕхӕдӕг дӕр. Ныр ам иу чиныгкӕсӕг фылдӕр ис — абонементтӕ цæттæ кæныны хайады Самты Мæдинæйæн скодтой регистрацион карточкӕ. Чызг сфӕнд кодта йӕхи ныффыссын ӕмӕ сывӕллӕттимӕ ардӕм ӕрбацӕуын.
“Моделон чиныгдон – æгас бинонтæн” — ацы бындуртыл хӕст у централизацигонд библиотекӕты системӕйы 4-ӕм филиал. Чиныг бакӕсын, мадзал бабӕрӕг кӕнын, уыимæ рӕстӕг пайдаимæ арвитынæн хистӕртӕн ӕмӕ сывӕллӕттӕн ам арӕзт ӕрцыд ӕппӕт гæнæнтæ дӕр. Чиныгдон ӕххӕссы 4 мин адӕймагæй фылдæрыл. Йæ байгоммæ та йын æхсызгонæй æнхъæлмæ кастысты.
