Æппæт дæр райдыдта газетæй. Рацыд абон — 13 январы, суанг 1703 азы. Хуынди “Ведомости”, бындур та йын сæвæрдта Пётр 1. Уæдæй сæдæгай азтæ рацыд, фæлæ мыхуыргонд æрмæгæн абон дæр бирæ уарзджытæ ис. Чи постхæссæгмæ кулдуары цур фенхъæлмæ кæсы, чи та киоскмæ атагъд кæны. Цалдæр фæлтæры чи схъомыл кодта, ахæм рауæгъдтытæ дæр ис Ирыстоны. “Ногдзау”-ы кæсджытæй бирæтæ абон æнусы сæрты акъахдзæф кодтой.
Журналы экземплярты нымæц хæццæ кæны 4 минмæ. Регионæн уыцы нымæц стыр у, фæлæ дзы куыст дæр къаддæр нæй. Журналы 9 кусæгæй йæ архайд алчидæр зæрдæйæ уарзы. Дæсгай рубрикæтæ, темæтæ, æркæстытæ… Сывæллоны курдиат раргом кæнын æмæ йæ фарсмæ æрбалæууын нымайынц сæ сæйраг хæсыл. Уыцы иузæрдион уарзт сабитæ дæр æнкъарынц. Редакцимæ цæуынц, хи хæдзармæ цæуæгау. Уымæн æвдисæн сæйраг журналы æмæ йæ сæйраг редакторы социалон хызæгтæ дæр.
Ирыстоны мыхуыры фæрæзты сæйрагдæртæй иу — “Мах дуг”. Литературон журнал хъомысджын сфæлдыстадон къорды сисы бынæй кæй цæуы, уый йæ алы номырыл дæр бæрæг у. Мадæлон æвзаг бахъахъхъæныны хъуыддаджы дæр сæ размæ стыр хæс æвæрынц.
“Мах дуг”-æн ис йæхи сæрмагонд литературон преми, йæ фæлгæты раргом кодтой бирæ ног авторты. Æгас Кавказы мадæлон æвзагыл цæуæг журналтæй æрмæст Мах дуг цæуы æрвылмæй.
Уыцы иу рæстæг, ныртæккæйы технологиты дуджы алы рауагъдæн дæр ис йæхи фарс интернеты. Фæлæ уый абон, 20 азы размæ та республикæйы уыд иунæг информацион портал — “15-æм регион”. Уæд космонавттæй уæлдай нæ уыдыстæм адæмы цæсты, — æрымысы Тохсырты Вадим. Уый тыххæй æмæ онлайн-журналистикæ цы у, уый зонгæ дæр нæ кодтой. “Основа”-йы сæйраг редактор мыхуырмæ æндæр цæстæй кæсы.
Омæ, æнкъарæнтæ æндæр вæййынц, æцæг. Сабидугмæ дæр асайынц адæймаджы — баба кæнæ нанайы цур абад æмæ сын газеты æрмæджытæ бакæс. Иннæ фарсмæ рафæлдахгæйæ та та-иу уыцы æхсызгон сыр-сыр скодта. Уæд ныхас æмæ йæ автормæ бынтон æндæр ахаст уыд. Ныр та журналист йæхи хоны блогер дæр.
Æмæ уый тыххæй журналист кæй кусы, уый сæйраг нæу: газет, журнал, портал кæнæ телеуынынад. Нæ нысан иу у — дзыллæмæ информаци фæхæццæ кæнын æмæ, сæйрагдæр та, фæххуыс уын.
Журналистикæйæн æххуысæн 2024 азы республикæйы бюджетæй рахай кодтой 300 милуан сомы. Æппæт рауагъдгонд газетты нымæц схæццæ 40 минæй фылдæрмæ. Ацы нымæц бæрæгбонмæ бардарджытæн æхсызгон ма уа, уымæн гæнæн нæй. Ивддзинæдтæ бахастой регионы сæргълæууæджы æрвылазон премимæ дæр.
Журналистикæ йæ бынаты бон дæр нæ лæууы, рæзы. Дæсныйады баззайынц йæ хъуыддагыл иузæрдион чи у, уыдон. Нæ республикæйы ис 66 официалон дзыллон информацион фæрæзы. Уыдоны та фæллой кæнынц сæдæгай адæймæгтæ, царды фæндагыл бæрнондзинадимæ цæуын чи равзæрста, уыдон.
