Æнцонвадат цард аразыны программæйы фæлгæты нæ республикæйы цалцæг кæнынц æхсæнадон бынæттæ æмæ бирæфатерон хæдзæртты кæртытæ. Базилинаг бынæттæ æвзарынц адæм сæхæдæг. Фæлæ куыстыты хæрзхъæддзинадæй алы хатт разыйæ нæ баззайынц. Æххуысагур фæсидтысты Адæмон фронтмæ.
Ахæм хъæстытимæ Адæмон фронтмæ баздæхтысты Дзæуджыхъæуы Леоновы номыл уынджы бирæфатерон хæдзары цæрджытæ. Кæрты сæ уæгъд рæстæг кæм арвитой, иу ахæм бынат нæй. Фарон ам цыдысты аивгæнæн куыстытæ æнцонвадат цардархайды проектмæ гæсгæ. Зæронд бандæттæ айстой. Фæлæ афӕдзы ‘рдæг сæ бынаты ногтæ нæ фæзынд.
Бахизæнты рухс нæй. Кæнинаг куыстытæй дзы конд æрцыд æрмæстдӕр асфальт. Адæмон фронты эксперттæ куыд фæнысан кодтой, афтæмæй ахæм уавæр банымайæн ис стыр аиппыл.
Московская уынджы 5-æм хæдзары дæр ахæм уавæр. Цæрджытæ рухс æрбауагътой сæхæдæг. Кæрты иу бырондон дæр нæй. 16 бандонæй та сæвæрдтой æрмæст 12.
Ныртæккæ Адæмон фронты уæнгтæ бæлвырд кæнынц, куыстытæ кæронмæ æххæстгонд цæуылнæ æрцыдысты, уый. Фарста арвыстой горæты администрацимæ. Æдæппæтæй фарон республикæйы ӕрзылдысты 88 кæртыл, уыдонæй 64 – Дзæуджыхъæуы.
