Æхсæнадон транспорты маскæтæ дарыны фæтк æххæстгонд куыд цæуы, уый радон хатт сбæрæг кодтой специалисттæ. Дзуаппдæттæг ведомствæты кусджытæ рейды рацæуынц æрвылбон. Профилактикон мадзалы сæйраг нысан – коронавирусы низ парахат кæнын ма уадзын. Республикæйы эпидемиологон уавæр æвзæрдæр кæны. Специалистты ныхæстæм гæсгæ, цæрджытæй маскæтæ чи дары, уыдоны нымæц фæфылдæр. Фæлæ фæтк чи халы, ахæмтæ дæр разыны. Уыдоны бафхæрынц административон хуызы. Кӕнынц семӕ профилактикон ныхас. Дыккаг хатт фæтк чи фехалы, уыдоны фæивар кæнынц.
Медицинон маскæтæ дарын – æнæмæнг санитарон домæн у. Æнæмæнг хъуамæ уой дуканимæ бацæуджытыл æмæ æхсæнадон транспорты бæлцæттыл. Уæрæсейы фæлхасгæнджытæм цæстдарды специалисттæ, Уæрæсейы Гвардийы нæ бæстæйы транспортмæ цæстдарды службæ æмæ транспорты министрады кусджытæ æрвылбон бæрæг кæнынц, низы ныхмæ домæнтæ куыд æххæстгонд цæуынц, уый.
Дзуапдæттæг ведомствӕты кусджытæ транспорты æппынæдзух кæнынц рейдтӕ. Ацы хатт специалисттæ фæткхæлдыдтæ фæнысан кодтой. Бæлцæттæн сæ кæцыдæр хай маскæтæ дарыны фæтк не ‘ххæст кæнынц. Бафхæрдзысты сæ административон хуызы.
Уæрæсейы транспортмæ цæстдарды службæйы кусджытæ ма шофыртæм сбæрæг кодтой бæлцæттæ ласынмæ бардæттæг гæххæттытæ
Специалисттæ сидынц цæрджытæм, цæмæй санитарон домæнтæм куыдфæндыйы цæстæй ма кæсой. Дарой медицинон маскæтæ. Æххæст кæной социалон дистанци дæр.
