Хъæууон хæдзарады райрæзтыл бакусын, куысты ног бынæттæ самал кæнын, хи фæрæзтæ фæфылдæр кæнын æмæ адæмы цардыуаджы домæнтæ фæхуыздæр кæнын. Ахæм хæстæ йæ размæ сæвæрдта Æрæфы районы разамынд.
Хъæууон хæдзарадон кооператив «Калух» фарон апрелы самал кодта 48 сæры хъуццытæ голштинаг мыггагæй. Ныртæккæ фермæйы кæнынц æрмæст æхсыры куыст. Мæймæ бакусынц æхсыры 30 тоннæйы. Продукци ласынц хойрæгты бынæттон дуканитæм. Фидæнмæ æхсыры куыст фæуæрæхдæр кæндзысты. Стурвосы нымæц суыдзæн 400 сæрæй фылдæр. Сараздзысты ма иу ног корпус. Проекты райрæзтыл кусынц хи фæрæзтæй.
Æхсæрысæры 20 азæй фылдæр культурæйы хæдзар нæ уыд. Сфæлдыстадон къордты архайынæн сывæллæтты хъуыд сыхаг хъæутæм цæуын. 2021-æм азы национ проект «Культурæ»-йы фæлгæты а-хъæуы сарæзтой культурæйы ног хæдзар. Залы ис 40 бадæн бынаты. Кусæнуæттæ, чиныгдон. Сабитæ сæхи фæлварынц кафджыты æмæ зарæггæнджыты къордты. Уыимæ ма аив дзырды дæсныдзинады дæр. Ивгъуыд аз бындурон цалцæджы фæстæ культурæйы хæдзар байгом Толдзгуны дæр. Бæстыхай 30 азы дæргъы цалцæггонд нæ уыд. Зарæггæнджытæ, кафджытæ, адæмон инструментты къордтæ. Сывæллæттæн ам фадат ис сæ курдиæттæ раргом кæнынæн. Музыкалон инструменттæ дзы фаг нæй, фæлæ сын сæ рæхджы хъуамæ балхæной бынæттон администрацийы ӕххуысӕй.
Æхсæрысæры ног фелсырон-акушерон пункт ныридæгæн цæттæ у. Арæзтадон куыстытæ дзы æххæст кæнын райдыдтой фарон. Фелсыры, стæй процедурон æмæ сылгоймæгты низтæ дзæбæхгæнæн кусæнуæттæ. Раздæр фелсырон-акушерон пункт уыд зæронд бæстыхайы. Хъæугæ кусæнгæрзтæ дзы фаг нæ уыд. Ныр кусыс æмæ нал! Æмткæй райсгæйæ, Æрæфы районы 2020-æм азы сарæзтой 7 фелсырон-акушерон пункты. Кæй уынут, уымæй уæлдай ма Махческ, Стыр-Дыгур, Быдыры Дæргъæвс, Сечер, Дзæгъепбарз æмæ поселок Советоны. Бæстыхæйттæ районы бæрны куы бакæной, уæд медицинон пункттæ кусын райдайдзысты. Ног дзæбæхгæнæндоны фелсыртæ адæмæн лæггад кæндзысты боны дæргъы. Уымæ гӕсгæ цæрджытæ медицинон æххуыс исдзысты афойнадыл.
Хæзныдоны хуыйæн фабрикæ байгом 2020-æм азы ноябры. Куыстуат саразын къухы бафтыд компани «БТК групп» æмæ Боллоты Таймуразы руаджы. Ныртæккæ фабрикæйы кусы 50 адæймаджы. Хуыйынц сæрмагонд уæлæдарæс. Фидæны фæнд кæнынц куыстуат рапарахат кæнын. Æмткæй райсгæйæ, районы фæзындзæн 500 куысты бынаты. Фабрикæйы фарсмæ ис культурæйы хæдзары зæронд бæстыхай. Декабры йæ райдыдтой бындуронæй цалцæг кæнын. Сног кодтой рудзгуытæ, рухсдæттæн системæ. Культурæйы хæдзары репетицитӕн зал нæй. Бындурон цалцæджы проектмæ хаст не ‘рцыд. Хъæуы йын уæлæмхасæн æхцайы фæрæзтæ.
Сечеры сывæллæтты рæвдауæндоны уæлæмхасæн бæстыхай фæзынд ивгъуыд аз. Раздӕр иу сывæллæттæ цыдысты кæддӕры совхозы бæстыхаймæ. Уыд заууат уавæры. Ныр уæлæмхасæн бæстыхайы бынæттæ ис 55 сабийæн. Сарæзтой сын дзы физкультурон æмӕ музыкалон залтæ. Хуыссæнуæттæ ӕмӕ хъазæн фæз. Сабиты ардæм хонынц сыхаг хъæутæй дæр.
Ацы аз районы ног объектты нымæцыл хъуамæ ноджыдæр бафта. Базилинаг цы бæстыхæйттæ сты, уыдоны та цалцæджы уд баулæфдзысты.
Уазиты Зæлинæ
