Дзулфыцæн продукци уадзынимæ баст хæрдзты кæцыдæр хай Уæрæсейы хицауад йæхимæ райсдзæн. Сæрмагонд уагæвæрды тыххæй радзырдта премьер Михаил Мишустин.
Æххуысы мадзæлттæ хъуамæ æрхæцой ссады аргъыл, афтæмæй та дзулы аргъ дæр уæлæмæ нал цæудзæн. Регионты дзул фыцыны куыст чи кæны, уыдоны уаргъ уый руаджы фæрогдæр уыдзæн. Æмткæй райсгæйæ, компенсацийы нымæц уыдзæн 2 мин сомы дзулы иу тоннæйæн. Ныхас цæуы, бирæ чи нæ лæууы, ахæм дзулыл. 15 тоннæйы суткæмæ чи фыцы, ахæм куыстуæттæн та мæймæ дæтдзысты фæйнæ милуан сомы. Уымæй егъаудæр компанитæн – 3 милуаны æмæ 500 мин сомæй фылдæр. Субсиди чи райста, уыцы куыстуатæн йæ продукцийы аргъыл хъуамæ мауал æфта.
