Фыццаг медицинон æххуыс бакæнын, хæцæнгарзимæ раст æмæ тагъд архайын, æмæ æндæр æфсæддон здæхтыты сарæхсын. Æцæг æфсæддон цæттæдзинад цы у, уый хорз зонынц æфсæддон-спортивон лагерь «Балц»-ы. Алы бон дæр — ног фæлварæнтæ. Æрыгон армионтимæ архайынц фæлтæрдджын специалисттæ. Сæ ахуыртæй иу бабæрæг кодта не сфæлдыстадон къорд дæр.
Хæцæнгарз æмбырдгæнгæйæ ахджиаг у æдасдзинады домæнтæ æххæст кæнын. Автомат æнæмæнг хъæуы раифтындзын. Гæбуты Хъазыбег хæцæнгарз æрæмбырд кодта 35 секундмæ. Специалисттæ куыд зæгъынц, афтæмæй уый хорз бæрæггæнæн у. Лæппу бирæ тренировкæ кæны æмæ антыстджынæй архайы æфсæддон мадзæлтты.
Фæсивæд æфсæддон рæгъы сты райсомæй нырма. Ахуыртæ цæуынц цалдæр бынаты. Авд сахаты — хæцæнгарзимæ архайын, тактикон æмæ медицинон цæттæдзинад. Уыимæ ма æнæмæнг æфсæддон топографи. Тагъд рæстæджы ма фæнд кæнынц быдыры ахуыртæ дæр.
Æфæсддон-спортивон лагер «Балц» цæуы Дзæуджыхъæуы 40-æм скъола æмæ 4 районы бындурыл. Сæ фылдæр æрыгон армионтæ сты — 8-æм æмæ 9-æм къласы ахуырдзаутæ. Иу фæлтæр цæуы 5 боны. Архайынц профессионалон инструктортимæ.
Лагерь бацæттæ кодтой горæты администраци æмæ 58-æм æфсады æфсæддонтæ. Фæззæджы та сæ цæттæдзинад равдисдзысты тактикон хъазт «Заря»-йы.
