Боксы клуб “Аллон”. Абон тренировкӕ фæткмæ гӕсгӕ нӕ цӕуы. Уазӕгуаты сæм — программӕ “Ирыстоны æхсар”-ы архайджытӕ Гобеты Максим, Уырысты Владимир, Дзитойты Руслан æмæ Гуыбаты Хъазыбег. Хӕрз ӕрӕджы дӕр ма тохы раззаг рӕнхъыты уыдысты. Хъахъхъӕдтой Райгуырӕн Бӕстӕ. Абон та сты лӕгдзинады урочы хъайтартæ. Æвзонг спортсментӕм бирӕ фæрстытӕ ис.
Уырысты Владимир хорзӕхджын у “Ирыстоны кадӕн” майданӕй. Фӕлӕ абон дзуры ӕндӕр, ӕппӕты сӕйрагдӕр хӕрзиуӕгыл. Лӕппутӕ хъусынц сӕ улӕфт ныууромгӕйӕ. Ахсынц алы дзырд дӕр. Уыдонӕн уый ахсджиаг урок у.
Ныхас — уыцы иу. Тохтыл, хӕсыл, Фыдыуӕзӕг уарзыныл. Фӕсивӕды раст дæнцæгыл схъомыл кӕнын. Абон уый у сӕйраг хӕс.
Ахсджиаг ныхасы фӕстӕ — спорты рӕстӕг. Гобеты Максим канд Дзӕуджыхъӕуы минӕвӕртты æмбырды сæрдары хӕдивӕг нӕу. У олимпаг резервы скъолайы тренер дӕр.
Комбинацитыл бакуыст. Спорты мастер Цӕлойты Сӕрмӕт фæсивæдæн скодта тренировкӕ. Ахæм зын уыдзæн, уый æнхъæл нæ уыдысты æвзонг боксертӕ. Фӕлӕ сын профессионалы уынаффӕтӕ бӕлвырд бабӕздзысты.
Архайдмæ йӕ хъус дары клуб “Аллон”-ы тренер Цӕлойты Гиуæрги. Уырны йӕ: ацы фембӕлд у тыхджын разӕнгардгӕнӕн фӕрӕз. Лӕппутӕ цӕудзысты ӕрмӕстдӕр размӕ.
Ахсджиаг ныхас æмæ рæсугъд спорт. Лӕгдзинады урок фӕрӕстмӕ. Йæ аразджытæ разы сты фӕстиуӕгӕй.
Æвзонг боксертӕн ацы урок у фыццаг. “Ирыстоны æхсары” ветерантӕ семæ зæрдиагæй фембæлдысты. Сӕйрагдӕр та уый у, æмæ лӕгдзинады хор байтыдтой æмæ ныридӕгӕн радта ӕвзартӕ.
