Алагир æмæ Беслæны маршруттæй бирæ адæм пайда кæнынц. Кæд линимæ ног нырыккон автобустæ рацыдысты, уæддæр бæлццæттæн сæ балц удæнцой нæ хæссы. Транспортмæ сæ бирæ æнхъæлмæ кæсын бахъæуы. Æмæ ма кæд райсомæй куысты бынатмæ кæнæ ахуырмæ схæццæ вæййынц, уæд сын фæстæмæ аздæхын та бирæ зындæр вæййы. Фылдæр хатт адæмы бахъæуы таксимæ фæдзурын. Уыцы афон уыдонæн дæр сæ лæггæдтæ аслам нæ вæййынц.
Автобутæ фæткмæ гæсгæ кæй нæ цæуынц, уый тыххæй адæм æппынæдзух дзурынц. Бæлццæтты хъæстмæ сæ хъус æрдардтой Адæмон фронты минæвæрттæ. Сбæрæг кодтой автобусты æхсæнцыд æмæ раиртæстой фæткхæлдтытæ.
Адæм æппæты тынгдæр сфæлмæцыдысты автобустæ изæрыгон кæй нæ вæййы, уымæй. Автоколоннæ 1210-ы разамонæджы хæдивæг нын куыд радзырдта, афтæмæй ныртæккæ фæстаг автобус ацæуы 20 сахаты æмæ 30 минутыл. Специалистты фæнды рæстæг иу сахаты æмгъуыдмæ адæргъвæтин кæнын.
Адæм бирæ рæстæг хъаст кодтой ног автобусты æнæрмæджы æхцайæ фæндаггаг бафидæн кæй нæй, уымæй. Ныр ацы фарста иуварсгонд æрцыд. Ахæм хуызы фиддон баххæсгæйæ фæфæстауæрц кæнæн ис фæрæзтæ дæр.
Адæмон фронты минæвæрттæ фарстамæ дарддæр се ‘ргом здахдзысты. Хæстæгдæр рæстæг æппæт курдиæттæм дæр æркæсдзысты æмæ сæ аиуварс кæныныл архайдзысты.
