Бындурон цалцæджы фæстæ Алагиры байгом сывæллæтты аивæдты скъола. 60 азæй фылдæр бæстыхай нывылгонд нӕ уыд. Куыстытæ райдыдтой апрелы. Ныр 6 мæйы фæстæ скъола у цæттæ. Скъолайы хъомылгæнинæгтæ тынг æнхъæлмæ кастысты, музыкалон инструментты уæлхъус та ногæй кæд æрбаддзысты, уымæ. Се ‘нъарæнтæ радзырдтой ме ‘мкусджытæн дæр.
Райдзаст концертон зал æмæ аив кусæн агъуыстытæ. Алагиры дыууæ къуырийы размæ бындурон цалцæджы фæстæ сабитæн ногæй йæ дуæрттæ байгом кодта аивæдты скъола. Сæ ныййарджытимæ æмæ сæ ахуыргæнджытимæ сывӕллӕттӕ цалцæггæнæн куыстыты фæудмæ зæрдиагæй æнхъæлмæ кастысты. Бæстыхай сног кодтой æхсæз мæймӕ. Ныр сывæллæттæ цингæнгæйæ музыкалон инструментты уæлхъус æрбадтысты.
Аивæдты скъола сцалцæг кодтой национ проект «Культура»-мæ гæсгæ. Ивд æрцыдысты бæстыхайы сæр, рудзгуытæ, дуæрттæ æмæ пъол. Ныртæккæ сабитæ ахуыр кæнынц фортепианойыл æмæ национ инструменттыл цæгъдыныл, кафын ӕмӕ ныв кæныныл. Ацы аз ам ис æртын ног хъомылгæнинагæй фылдæр.
Алагиры цæрджыты курдиæттæм гæсгæ, скъолайы байгом вокалон хайад дæр. Ныртæккæ йæм ис хи ныффыссыны фадат. Ног уавæрты кусын, ахуыргæнджыты ныхæстæм гæсгæ, у бирæ æхсызгондæр.
Аивæдты скъолайæн бирæ курдиатджын рауагъдонтæ ис. Йæ хъомылгæнинæгтæ æппынæдзух свæййынц алыхуызон æркæстыты уæлахиздзаутæ. Ныр сабитæ æмæ сæ ахуыргæнджытæ абоны ног гæнæнтимæ тырнынц аивады ног бæрзæндтæм.
