Æрмæст Хетæгкаты Къостайы зындгонд æмдзæвгæдæтæ нæ, фæлæ ма аргъæуттæ, зарджытæ тагъддзуринæгтæ. Рувас, тæрхъус, фыранк – сывæллæттæ æхсызгонæй фервитынц сæ рæстæг дзураг хъазæнтимæ. Ахæм цымыдисаг хуызы ахуыр кæнынц мадæлон æвзаг.
Плиты Альбинæ 12 азы кусы хъомылгæнæгæй. Сывæллæттæм уарзондзинад æй æрбакодта рæвдауæндонмæ. Филолог уæвгæйæ, бæлвырд зоны, сабитæ мадæлон æвзаг базонынæн фыццаг къахдзæфтæ кæд акæной, уый.
Алагиры сывæллæтты 7-æм рæвдауæндоны цымыдисаг хъазæнтæ фæзындысты фарон. Хъомылгæнджытæ æмæ сабитæ сæхæдæг дæр сæм æхсызгонæй æнхъæлмæ кастысты. Ахуыргæнæндоны ис 7 къорды – кæстæрæй цæттæгæнæнмæ, уым ирон æвзаг ахуыр кæнынц æнæмæнг. Ноджы ма ам ис чысыл музей. Арæзтой йæ æгас коллективæй, æххуыс сын кодтой ныййарджытæ дæр.
Ам ис куыд къухæй конд экспонаттæ, афтæ рагон дзауматæ дæр, зæгъæм, мæнæ ацы иту. Фынг цы у, уый базонын, национ уæлæдарæс фенын, фыдæлты царды уаг базонын. Сывæллæттæн ам æппынæдзух фæкæнынц экскурситæ.
Æмæ, æнæмæнг, ирон æвзагыл чингуытæ кæсын. Ног ахуыры азы райдиан ма кусæндон райсдзæн хъазæнты æмæ литературæйы ног парти. Мадæлон æвзаг ахуыр кæнынæн сывæллæтты 7-æм рæвдауæндоны нысангонд æрцыд сæрмагонд методикæ. Дзырдæн, хистæр къорды сывæллæттæ æнцонæй ныхас кæнынц иронау. Куыд фæстиуæг – æркаст “Иры фидæны” æппынæдзух свæййынц раззагдæртæ.
