“Алания-Молл”-ы зынгсирвæзт ахуыссын кодтой

Базарадон центр “Алания-Молл”-ы абон цы зынгсирвæзт æрцыд, уымæн йæ аххосæгтæ рабæрæг сты. Æнæнхъæлæджы уавæрты министрады пресс-службæйы хъусынгæнинагмæ гæсгæ арæзтадон куыстыты рæстæг æхсидæвтæ бахаудысты бæстыхайы цур арæзтадон æрмæджытыл. Уыдон дæр судзынмæ фесты. Центры къултыл уайтагъд пиллон арт схæцыд. Хорз, æмæ зынг мидæмæ нæ баирвæзт. Куыддæр тæссаг уавæр сæвзæрд, афтæ 400 адæймагæй фылдæр æдас ранмæ ракодтой. Арт ахуыссын кæныныл архайдтой 66 зынгхуыссынгæнæджы æмæ 22 техникон иуæджы. Сæ фарсмæ æрбалæууыдысты æнæнхъæлæджы уавæрты министрады хайæдтæ. Цыбыр рæстæгмæ арт ахуыссын кодтой. Раздæр ма уын куыд хъусын кодтам, афтæмæй зианхæссæг цауы тыххæй видеоæрмæг апарахат кодтой социалон хызты. Кадртæ систой, базарадон центрмæ хæстæг чи уыд, уыцы адæм.
7 адæймаджы агъуысты сæр кæй баззадысты, уымæ гæсгæ фыдбылызы бахаудысты. Ирвæзынгæнджытæ сæ æристой æмæ сæ зианæй бахызтыстæм.