Дзиуаты Анжелæ маргъдарæн фермæ сарæзта 2023-æм азы. Райдианы йын баххуыс ын кодта йæ фырт – иумæ балæвæрдтой курдиат грантмæ æмæ райстой фиддон — 1 милуан 800 мин сомы. Бройлеры цъиутæ самал кæнынæн спайда кодтой гранты æмæ хи фæрæзтæй. Æдæппæтæй балхæдтой 50 мины.
Райдайæг амалхъомтæн паддзахадон æххуыс ахсджиаг у. Уæлдай æргом здахынц сæрмагонд æфсæддон операцийы архайджытæм æмæ сæ бинонтæм. Плиты Виталийы фырт афæдзæй фылдæр уыд тохы бынаты. 2026 азы нæлгоймаг балæвæрдта курдиат грант “Агромотиватор” райсынмæ æмæ йын радих кодтой 3 милуан 900 мин сомы. Абон Виталийы фермæйы ис 6 мин цъиуы бæрц. Фæндты — йæ куыстад фæуæрæхдæр кæнын.
Фæлхасгæнæг дуканиты тæрхæджытыл цы фермерон продукци уыны, уый бындурыл лæууы егъау куыст – мæргътæ балхæнынæй, кусæнгæрзты модернизацимæ æмæ кондады гуырахст фæуæлдæр кæнынмæ. Цæмæй ахæм проекттæ рæзой, уый тыххæй хъæуы уæлæмхасæн гæнæнтæ. Уымæн æххуыс у гранты системæ.
“Агромотиватор” – райдайæг амалхъомтæн у æххуысы ног фæрæз. Проекты фæлгæты сæрмагонд æфсæддон операцийы архайджытæн æмæ ветерантæн фермерон бизнес скусынæн сæ бон у 7 милуан сомы онг райсын. Æххуысæй спайда кæнынæн ахсджиаг домæн у куыстады ног кусæн бынæттæ скæнын.
Сæрмагонд æфсæддон операцийы архайджытæн агробизнесы æххуыс æрмæст фæрæзтæ не ‘сты. Уый фадат у æфсæддон цауы бынатæй чи сыздæхт, уыдонæн Райгуырæн зæххыл хи хъуыддаг райдайынæн. Разæй – ног проекттæ æмæ ног нæмттæ республикæйы аграрон секторы.
