Ацы аз Цæгат Кавказы хæххон-металлургон институты студенттӕ-архитектортӕ сӕрдыгон практикӕйы уыдысты Уӕрӕсейы стыр сахарты. Иу къорд ацыд Санкт-Петербургмæ. Уым куыстой наукон-иртасӕн институты. Æххуыс кодтой кънйаз Николайы галуан цалцӕг кӕнынӕн гӕххӕттытӕ аразынӕн. Арæзтой хахнывтæ ГОСТ-мæ гӕсгӕ, ахуыр кодтой вазыгджын компьютерон программӕтӕ ӕмӕ иртæстой, къултæ цас хъыгдард сты, уый.
Иннӕ къорд та практикӕйы ацыд Мӕскуыйы зындгонд архитектурон бюромӕ. Фæлтæрдджын æмкусджытимæ иумæ, арӕзтой 3Д-хуызæгтæ. Уыдон уайтагъд бамбӕрстой — Цӕгат Ирыстоны тынг хорз ахуыр кӕнынц хахнывтæ къухӕй кӕныныл æмæ не скъола у бӕстӕйы хуыздӕртæй иу. Ног фӕлтӕрддзинад фæсивæдæн баххуыс кодта Дзӕуджыхъӕуы архитектурӕмӕ ног цӕстӕй акӕсынӕн.
Студентты сӕрдыгон практикӕ баст у, Цӕгат Ирыстоны архитектурӕйы афæдз кæй у, уыимæ. Культурӕйы цыртдзӕвӕнтӕ раиртасыны тыххӕй ацыдысты республикӕйы алы районтӕм. Зӕгъӕм, Ӕрыдоны уыдысты рагон стыр хӕдзары.
Ацы практикӕйы мидис уый мидӕг ис, ӕмӕ фыццаг хатт ӕппӕт курсыты студенттӕ баиу сты сфӕлдыстадон къордты. Архитектортӕ барстой агъуыстытӕ ӕмӕ ахуыр кодтой арӕзтадон конструкцитӕ, дизайнертӕ та кодтой проектты рӕсугъд компьютерон нывтӕ. Командӕтӕ куыстой культурӕйы цыртдзӕвӕнтимӕ Ӕрыдон, Дур-Дур ӕмӕ Дзӕуджыхъӕуы. Зæгъæм, бакуыстой Гӕздӕнты Гайтойы историон хӕдзар рацаразыны проектыл.
Мӕскуы ӕмӕ Санкт Петербургæй университетмӕ ӕрбацыд арфӕйы фыстӕджытӕ. Практикӕйы разамонджытӕ раппӕлыдысты Цӕгат Ирыстоны студентты хорз цӕттӕдзинадӕй. Республикæйы объекттæн та цы проекттӕ скодтой, уыдон лӕвӕрд ӕрцӕудзысты Культурӕйы цыртдзӕвӕнтӕ хъахъхъӕныны комитетмӕ.
Æвзонг архитекторты проекттӕ, гæнæн ис, æмæ суой ӕцӕг арӕзтадон документты бындур. Сæ хахнывтæм гӕсгӕ фæнд кæнынц республикӕйы рагон бæстыхæйттæ ног кæнын. Уый феххуыс уыдзӕн Цӕгат Ирыстоны архитектурӕ фидӕны фӕлтӕртӕн бахъахъхъӕнынӕн.
