Атарты Георгий амыдта цæттæгæнæн комитеты æмбырд

Цæгат Ирыстоны кадджын уавæры байгом кæндзысты Архитектурæйы афæдз 24-æм апрелы креативон индустриты форум “Этно-Мы”-йы фæлгæты. Уый тыххæй ныхас цыд цæттæгæнæн комитеты æмбырды. Амыдта йæ вице-премьер Атарты Георгий. Сæйраг темæ – мадзæлтты пълан сфидар кæнын, уыдзысты 20-æй фылдæр. Хыгъды 3 конкурсы æрыгон архитектортæн, урбанисттæн æмæ нывгæнджытæн: “Новые горизонты”, “Новые берега” æмæ “Место жизни – мечта”. Ахуыргæнæндæтты рауагъдонтæн сараздзысты “Профоринтацион сабаттæ”. Студенттæн æмæ æрыгон специалисттæн та “Архитектурон практикум”-тæ. Сæ фæлгæты уыдзысты сфæлдыстадон фембæлдтытæ, практикон ахуыртæ къабазы раззагдæртимæ. Дæсныйадæвдисæг ахуыртæ скæндзысты республикæйы цæрджытæн дæр. Ныхас мы цыд Дзæуджыхъæуы истори æмæ культурæйы цыртдзæвæнты æмбырдгонд сразыныл. Профилон министр Бетанты Марат куыд радзырдта, афтæмæй æмархайд цæуы культурон хæзнатæ хъахъхъæныны æмæ сæ пайда кæныны Комитетимæ иумæ. Проект адæмы размæ рахæсдзысты сентябры. Уымæй уæлдай ма снысан кæндзысты 100 информацион фæйнæджы регионалон æмæ федералон нысанимæ историон бæстыхæйтты фæдыл. Ацы аз республикæйы сæйраг сахары ацæудзæн æппæтадæмон форум дæр. Кæрæдзийæн сæ фæлтæрддзинадæй фæхай кæнынмæ сæмбырд уыдзысты дæсгай эксперттæ. Мадзæлтты хыгъд та кæронмæ æрхæццæ уыдзæн октябры, фæсивæдон форум “Строим Осетию”-йæ. Уæ зæрдыл уын æрлæууын кæндзыстæм, архитектурæйы афæдз снысан кæныны фæдыл указ бафыста Сергей Меняйло. Йæ сæйраг нысан – ацы здæхты райрæзт æмæ парахат нæ регионы.