Ацы халсартӕ зайынц ӕнӕ химийӕ. Агрокъласонтæ пайда кӕнынц ӕрмӕст ӕрдзон хъацӕнӕй. Дыууӕ боны иу хатт сбарынц джитъриты дæргъ. 10-12 сантиметры куы уа, уæд ын æртоныны афон у. Æгæр чи астыр, уый — салатмæ. Сыхаг хуымыл та — пъæмидортæ. Уыдон дæр банымайын хъæуы. Бӕрӕггӕнӕнтӕ та фыссынц боныджы.
Томат “Де Барао”-йыл стыр цупӕлттӕ æрзайы, раст æм кæй зилынц, уый фӕрцы. Фидӕны фарӕстӕмкъласонтӕ уæлдай сыфтæ æртонынц, цæмæй халсартæ фылдæр пайда исой зæххæй. Афтӕ ахуыр кӕнынц зайӕгойты анатоми практикӕйыл.
Цӕмӕй сыл зайӕгой йӕ хъару ма хардз кӕна, уый тыххӕй-иу уæлдай къалиутæ ралыг кодтам. Уӕд æппӕт тыхтӕ дӕр ацæуынц халсар рӕгъӕд кӕнынмӕ, ӕнӕпайда сыфтӕртӕм нӕ, фӕлӕ. Мах ӕй кӕнӕм томаттыл, джитъритыл ӕмӕ ӕндӕр культурӕтыл. Иу та нын дзы эксперименталон пъæмидор у. Фӕндыд нӕ, ӕнӕ ӕхсӕдгӕйӕ цы ‘рцӕудзӕн, уый фенын. Куыд уынут, афтӕмӕй ам сыфтæртæ сырӕзтысты ӕмӕ бирӕ хъару айстой. Уымӕ гӕсгӕ эксперименталон къутӕрыл тыллӕг бирӕ къаддӕр ис.
Скъолайы эксперименттӕ урокты арӕнтӕй ахызтысты. Ацӕмӕз йæ зонындзинæдтæ сæхи цæхæрадоны дæр бафæлвæрдта. Йæ халсартӕ ахæм хорз ӕрзадысты æмæ сын суанг æлхæнджытæ дæр разынд. Афтæ скъоладзау бакуыста йæ фыццаг ӕхца.
Райдианы уый хуымӕтӕджы эксперимент уыд. Ӕнтыстыл мӕ зӕрдӕ нӕ дардтон, фӕлӕ мын рауад. Уымӕ гӕсгӕ дарддӕр кæнын уыцы хъуыддаг.
Ацӕмӕз кусы хӕдзары дӕр ӕмӕ скъолайы дӕр. Скъоладзауты цæхæрадоны ма зайынц цывзы, æрыскъæф, имбирь ӕмӕ лимонтӕ. Химикатты бӕсты, зианхӕссӕг сасчыты ныхмæ, ам ис хъӕдабӕ ӕмӕ календулӕ. Хурмæзилæджы хуымтæ дæр ахуыргӕнинӕгтӕ ныссагътой наукон ӕгъдӕуттӕм гӕсгӕ. Уыцы куыст сси проекты рӕсугъддӕр хай. Фæлæ зæрдæмæдзæугæ æнтыстытæ — æнæзивæг куысты фæстиуæг. Лӕппутӕ фӕллойы ахуыргӕнӕгимӕ сӕхӕдӕг сарæзтой хъӕрмуат. Информатикӕйы ахуыргӕнӕг та сын баххуыс кодта проект скæнынæн. Дзӕвгар рӕстӕг скъоладзаутӕ къӕртагай хастой дон, фæлæ æрæджы шланг æрбауагътой. Ахуырдзаутӕн проект афтӕ цымыдисаг у, ӕмӕ барвӕндонӕй ӕрбацӕуынц сæ цæхæрадонмæ суанг каникулты рӕстӕг дӕр.
Агрокълас нӕм ныр ӕртыккаг аз ис. Сабаты сывӕллӕттӕн вӕййы сӕрмагонд ахуыртӕ, уымӕ гӕсгӕ сæ уыцы бон суæгъд кæнæм иннæ уроктӕй. Ахуыр кӕнынц теори дӕр ӕмӕ практикӕ дӕр. Скъоладзаутӕ хуымтæм зилынц сӕхи хъӕппӕрисӕй: ӕрбацӕуынц сыл дон кӕнынмӕ ӕмӕ сӕ уавӕр бӕрӕг кӕнынмӕ. Ам тыллӕг алы бон дӕр ӕмбырдгӕнӕн ис, уымӕн ӕмӕ зайӕгойтӕ тынг бирӕ сты. Сывӕллӕттӕм уый ӕцӕг диссаг кӕсы, сӕхӕдӕг дæр æрбадзурынц ӕмӕ бафӕрсынц, абон ӕрбацӕуын хъӕуы ӕви нӕ.
Халсартӕ ӕмбырд кӕнынц суанг зымӕджы дӕр. Октябрӕй апрельмӕ хъӕрмуат уыд кабинеты. Уазал рӕстӕг зайӕгойтӕ хъарм кодтой фитолампӕтӕй. Тыллӕг та æмиасæй уӕрстой кълӕсты ‘хсӕн. Сӕ куысты бындурыл ахуырдзаутӕ бацӕттӕ кодтой ӕмӕ ӕнтыстджынӕй бахъахъхъӕдтой наукон проекттӕ. Уалдзӕджы та ӕнӕхъӕн республикӕйӕн сарӕзтой онлайн-мастер-класс.
Агрокълæсты куыст скъоладзауты тынг разӕнгард кӕны. Мах уынӕм проекты ахадындзинад, уымӕн ӕмӕ ахуырдзаутӕ сӕхӕдӕг аразынц цӕттӕ продукт. Ӕмбарынц, уыцы фӕлтӕрддзинад сын кӕй феххуыс уыдзӕн фидӕны дӕсныйад ӕвзарынӕн. Бӕрзонд технологиты ӕнусы ахсджиаг у равдисын, нырыккон хъӕууон хӕдзарад æнгом баст кӕй у IT-къабазимæ, фӕлӕ йын кӕй ис æцæг, цӕсты ахадгӕ фӕстиуӕг. Ахуыры азы райдайӕнмӕ ӕнхъӕлмӕ кӕсӕм ног ифтонггарзмӕ. Ацы сӕйраг проекты заказгӕнӕг у куыстуат “Кавказы Сӕнӕфсирдон”
Сентябры скъола райсдзӕн ног техникӕ: инкубатор, цыхтахсӕн, аквариум. Ифтонггæрзтæ балхӕндзысты агрокъласы 29 ахуыргӕнинагӕн. Раздӕр-иу сæ цӕуын бахъуыд Хӕххон паддзахадон аграрон университет ӕмӕ Фарныхъӕумæ. Фӕззӕгмӕ хӕстӕг скъолайы цӕхӕрадоны картоф дæр скъахдзысты. Ратдзысты йæ скъолайы хӕрӕндонмӕ, цӕмӕй куысты фӕстиуӕгæн æгас скъола дæр бамбара йæ хорз ад.
