А фæстаг рæстæг республикæйы уæлдай æргом здахынц национ культурæмæ. Аразынц алыхуызон равдыстытæ, уыимæ ногæй æвзæрын кæнынц, бирæ рæстæг рохуаты чи уыд, уыцы рагон ирон музыкалон инструментты аразынад. Ахæм æрмадз æрæджы байгом Тарскæйы хъæуы. Уым сæ уыцы иу рæстæг аразгæ дæр кæнынц æмæ сыл цæгъдын дæр ахуыр кæнынц. Уæдæ Беслæны та фæзынд адæмон инструментты оркестр. Сфæлдыстадон къорд кæны фыццаг кахдзæфтæ. Нæ уацхæсджытæ сæ бабæрæг кодтой. Курдиатджын фæсивæды тыххæй радзурдзæн Хъараты Маринæ.
Фыццаг уал инструмент саразын хъæуы. Уый фæстæ рог ныдзæвд дала фæндыры тæнтæм, æмæ Беслæны культурæйы хæдзары концертон зал ирон музыкæйы фæлмæн зæлтæй айдзаг вæййы.
Адæмон инструментты фидæны оркестр ныртæккæ мæнæ ахæм хуызы ис. Чи дæсны музыкант у, чи хæдахуыр, чидæр та музыкалон инструмент йæ къухмæ фыццаг хатт райста. Зæгъæм, Амыраны театры актрисæ БулАцаты Виктория. Дала фæндырыл цæгъдын æй рагæй фæнды. Гæнæн ын куыддæр фæцис, афтæ ахуыр кæнынмæ æрбацыд.
Адæмон инструменттыл цæгъдын фидæны музыкантты ахуыр кæны Гæбойты Максим. Профессионалон музыкант цæгъды фортепиано, фæндыр, балалайкæ æмæ бирæ æндæр инструменттыл. Ацы аз ахуыр кæнынмæ бацыд Налцыччы аивæдты институтмæ. Уыимæ ма культурæйы хæдзары архайы фидæны оркесторы райрæзтыл.
Домрæ, балалайкæ, дала фæндыр, уадындз, фортепьяно. Музыканттæ сæ дæсныйад фæлтæрынц алы инструментыл дæр. Тагъд ма ахуыр кæндзысты хъисын фæндырыл цæгъдын дæр.
Дала фæндырыл цæгъдын сахуыр кæныны бон у куыд сывæллæттæн, афтæ хистæртæн дæр. Хъуамæ рахиз къух фæндыры хъистыл æнцонæй цæуа. Цæмæй адæймаг мæнæ афтæ дæсны цагъд кæна, уый тыххæй йæ ахуыр кæнын хъæуы дыууæ азæй фылдæр.
Музыканттæн сæ ахуыртæ цæуынц къуыри æртæ хатты дыгай сахатгай. Фæлæ национ инструменттыл цæгъдын ахуыргæнинагтæн сæ зæрдæмæ афтæ тынг æцуы æмæ сæ репетици суанг изæрмæ ахæсы.
Сфæлдыстадон коллектив йæ къордмæ исы сывæллæтты. А фæстаг рæстæг республикæйы уæлдай æргом здахынц националон культурæмæ. Аразынц алыхуызон æрмгуысты равдыстытæ, уыимæ ногæй æвзæрын кæнынц, бирæ рæстæг рохуаты чи уыд, уыцы рагон ирон музыкалон инструментты аразынад. Ахæм æрмадз байгом Тарскæйы хъæуы. Уым сæ уыцы иу рæстæг аразгæ дæр кæнынц æмæ сыл цæгъдын дæр ахуыр кæнынц.
