7 сахаты бæрц 15 дохтыры Беслæны медицинон центры архайдтой Галина Кондратенкойы цард бахъахъхъæныныл. Ахæм операцитæм стыр сахарты дæр фылдæр хатт сæ ныфс нæ бахæссынц. Цæгат Ирыстоны медицинон кусджытæ та уӕззау рынчынты дӕр сæ къæхтыл слæууын кæнынц.
Къуыри размæ ацы сылгоймагӕн йæ зæрдæйæн скодтой уæззау операци. Аневризмæ æмæ йемӕ баст фӕстиуджытӕ. Дохтырты куыд зæгъынц, атфæмæй ахæм диагноз рабæрæг кæнынц тынг стæм хатт. Афтæ рауад Галина Кондратенкоимæ дæр. Къорд рæстæг сын не ‘нтыст низӕн йæ хъæд раиртасын. Патологи рабæрæг кодтой æрмæст Беслæны медицинон центры.
Ахæм операци скæнынмæ алкæцы дохтыр нæ хæссы йæ ныфс. Суанг ма Мæскуыйы дæр чысыл ис ахæм специалисттæ. Беслæны медицинон центры та афæдзы дæргъы ахæм операци скæнынц 10 адæймагæн. Диссаг та уый у, æмæ ахæм диагнозимæ бирæ нæ фæцæрынц. 70-аздзыд Галина Кондратенкойæн куыд бантыст уыцы низӕн бабыхсын, уый дохтыртæ сæхæдæг дæр не ‘мбарынц.
Аортæйæн операци цыд 7 сахаты. Сылгоймагæн операцийы рæстæг йæ зæрдæйы куыст барæй æрлæууын кодтой. Йæ буары тæвд ын æрхауын кодтой 26 градусмæ. Нал æм уагътой туг дæр. Хицæнæй йын кусын кодтой æрмæст йæ сæры мæгъз.
Сылгоймаджы фервæзын кæныныл тох кодтой 15 дохтыры. Иумæйаг æмæ раст куыст. Ахӕм уавӕры ирвæзӕн ӕххуыс кæнынц æрмæст лæвар, медицинон полисмæ гæсгæ, кæд æмæ операцийы æппынкъаддæры аргъ у милуан сомы æмбис.
Уæрæсейы йæ цардæй чи ахицæн вæййы, уыдонӕн се ‘рдæг амæлы зæрдæйы низтæй. Фæлæ нырыккон диспансеризацийы руаджы специалисттæ рагацау рабæрæг кæнынц æмæ дзæбæх кæнынц низтæ.
