Беслæны теракты хъыгдæрбаййафджытæй 300 адæймагæй фылдæрæн бакæндзысты материалон æххуыс. Æхцайы фæрæзтæй фадат уыдзæн фæсарæнтæм ацæуын, æнæниздзинад фæфидардæр кæнын.
Æхца рахай кæндзысты, нæ бæстæйы санаторон-курортон путевкæтæ райсын кæй хъæуы, уыдонæн дæр. Теракты чи бахауд, уыдонæн социалон æххуысы мадзæлттæ аразы Цæгат Ирыстоны фæллой æмæ социалон рæзты министрад паддзахадон программæйы фæлгæты. Дзуапдæттæг министрады йæ æххæст кæндзысты 4 азы. Ацы аз ӕмбӕлгӕ æххуыс бакӕндзысты 336 адæймагӕн. Уыцы хъуыддагæн рахай кодтой 44 милуан сомы. Курдиат бадæтгæйæ бахъæудзæн паспорт, хъыгдæрдбаййафæг кæй дæ уый ӕвдисӕндар, æмæ путевкæйы справкæ. Путевкæйы справкæ райсæн ис бынæттон дохтырæй. Нæ бæстæйы санаторитæй æнæниздзинад фæхъæддыхдæр кæнынæн равзарæн ис кæцыфæндыдæр.
