Абон, Бинонты, уарзондзинады ӕмӕ иузӕрдиондзинады бон, Уырыссаг академион театры раарфæ кодтой сæрмагонд æфсæддон операцийы архайджыты ныййарджытӕн. Кадджын мадзалы уыдысты республикӕйы сӕргълӕууӕг Сергей Меняйло ӕмӕ Парламенты сӕрдар Тускъаты Таймураз. Регионы разамонӕг загъта бузныджы ныхæстæ бинонтæн. Уыдон схъомыл кодтой, ныртӕккӕ раззаг рӕнхъыты чи хӕцы, уыцы аккаг фыртты.
Сергей Меняйло ма бинонтæн радта хӕрзиуджытӕ. 20, 30 ӕмӕ 50 азӕй фылдӕр иумӕ чи фӕцард, уыцы къӕйттӕ райстой арфӕйы фыстæджытæ ӕмӕ майдантӕ “Уарзондзинад ӕмӕ иузӕрдиондзинады тыххӕй”. Æнӕнхъӕлӕджы лæвар — сценæйыл æцæг чындзӕхсӕв. Сӕ цард баиу кодтой сæрмагонд операцийы архайӕг Михаил Власов ӕмӕ Дзусаты Эмилия. Михаил цæры Пятигорскы, чындз — бынӕттон цӕрӕг. Базонгӕ сты 2020-æм азы. Уӕд Эмилия ахуыр кодта Цӕгат Кавказы федералон зылды университеты юридикон факультеты. Лæппу та уыдис Краснодары ӕфсӕддон тӕхджыты училищæйы курсант ӕмӕ йӕ фӕллад уагъта Пятигорскы. Ныртӕккӕ хӕстон архайды ветеран службӕ кӕны 196-ӕм авиацион полчы.
