Боныхъæд цавæр уыдзæн, уый базонын, кулинарон рецепт ссарын кæнæ та цымыдисаг фарстатыл аныхас кæнын. Ацы æмæ æндæр пайда гæнæнтæ сты Гæззаты Алан цы уæлæфтуаныл бакуыста, уым. Лæппу нырма скъоладзау уыд, афтæ йæ бамбæрста фидæны программист кæй уыдзæн. Йæ бæллицмæ æнтыстджын къахдзæфтæ кодта. Дыууæ азы размæ каст фæци Цæгат Ирыстоны паддзахадон университеты физикон-техникон факультет.
Æрæджы Алан каст фæци Санкт-Петербургы информацион технологиты институты магистратурæ. Ныридæгæн кусы бæстæйы егъаудæр компанитæй иуы. Фарон ноябры сси уырыссаг æвзагыл нейрохызтæ чи арызта, уыдонæй иу. Йæ проект у чат GPT кæй хонынц, уымæй бирæ къаддæр æмæ дзы æппæт гæнæнтæ адæймаг аразы йæхæдæг. Уыимæ, уæлæфтуан кусы æнæ интернетæй дæр.
Мæйы размæ проект рамбылдта националон преми “Приоритет: Цифра 2025 “, информацион технологиты къабазы. Номинантты ‘хсæн уыдысты ахæм егъау компанитæ, куыд Сбер, ВТБ, Альфа-Банк, Норникель. Фæлæ эксперттæ стыр аргъ скодтой нейрохызæн. Телефоны бирæ бынат нæ ахсы, кусы алы гарзыл дæр.
Нейрохызæй райдыдтой пайда кæнын алыхуызон компаниты. Ныридæгæн уæлæфтуан пайдагæнджытæ сæ ифтонггæрзты сæвæрдтой 5 мин хатты. Аланы ныхасмæ гæсгæ, ахæм бæрæггæнæн къухы бафтыд иумæйаг профессионалон куысты руаджы. Мадзаларазджытæ фæнд кæнынц проект ноджы фæхуыздæр кæнын.
