Ног заводы кусджытӕ цӕттӕ сты фӕлхӕрттӕ ӕвзарынмӕ. Фыццаг уал бырӕттӕ иууылдӕр къордгӕйттӕй дих кӕндзысты. Пластик, гӕххӕтт, авг, згъӕр ӕмӕ органикӕ арвитдзысты бакусынмӕ. Иннӕ — аласдзысты полигонмӕ ныгӕнынмӕ. Бынӕттон компани куыд хъусын кӕны, афтӕмӕй куыстуат ныридӕгӕн райста ӕппӕт документтӕ официалон куыстӕн.
Ам афӕдзмӕ равзарæн ис 100 мин тоннӕйы онг бырӕттӕ. Процесс арӕзт у цалдӕр къахдзӕфӕй. Раздӕр фӕлхӕрттӕ ӕрбаласынц исӕнмæ. Уым уал кусджытӕ айсынц егъау ӕмӕ тӕссаг дзауматæ, цӕмӕй техникӕ ма фехӕла. Уый фӕстӕ бырӕттӕ цӕуынц конвейерыл сӕрмагонд зилгӕ барабанмӕ. Машинӕ аскъуыны дзӕкъултӕ, фӕхицӕн кӕны змис ӕмӕ лыстӕг хойраджы фӕлхӕрттӕ.
Специалисттӕ зӕрдӕ ӕвӕрынц территорийы сыгъдӕгдзинадмӕ иудадзыг хъус дарынӕй. Эксперттӕ бӕрӕг кӕнынц заводы алыварс уӕлдӕф ӕмӕ мӕры уавӕр. Бынӕттон компанийы минӕвӕрттӕ куыд зӕгъынц, афтӕмӕй экологон бӕрӕггӕнӕнтӕ иууылдӕр ӕмбӕлгӕ сты.
Заводы зӕххыл ма ис, ивгъуыд азты дӕргъы цы бырӕттӕ ӕрӕмбырд, уыдон дӕр. Ныртӕккӕ йын эксперттӕ ахуыр кӕнынц йе сконд. Уый фӕстӕ бауынаффӕ кӕндзысты, уыцы фӕлхӕрттӕ ласынӕн цавӕр машинӕтӕ хъӕуы, ууыл. Зӕронд бырӕттӕн ногӕй бакусӕн куы нӕ уа, уӕд сæ æрвитдзысты полигонмæ ныгӕнынмӕ.
Завод байгом кӕнынӕй зӕрдӕ ӕвӕрынц октябры мӕйы. Куыстуатæн уыдзæн бӕлвырд пълан: фыццаг бырӕттӕ ӕвзарын, стӕй пайдайаг хомаг ӕмбырд кӕнын ӕмӕ ӕрмӕст уый фӕстӕ — уӕлдӕйттӕ ныгӕнын. Регионӕн уый у ахсджиаг къахдзӕф размӕ. Ног проект феххуыс уыдзӕн фӕлхӕрттӕ ӕмбырд кӕныны фарста æнтыстджынæй алыг кӕнынӕн.
