Парти «Иугонд Уæрæсе»-йы минæвæрттæ федтой Даскъофы скъолайы бындурон цалцæг куыд цæуы, уый. Ныридæгæн ногæй баивтой бæстыхайы сæр, коммуникацитæ, банæлдтой мидæггаг куыстытæм. Скъола сифтонг кæндзысты æппæт нырыккон ифтонггæрзтæй.
Фидар æфсæндар æмæ хæрзхъæд æрмæг. Бæстыхайы сæр ногæй баивын уыд сæйрагдæр нысæнттæй иу. 2003-æм азы тыхджын дымгæйы рæстæг объекты сæр хъыгдæрд баййæфта. Уый фæстæ иу къæвдайы дон кæй хъардта, уый аххоссæй пъолтæ æмæ къултæ сæвзæр сты. Бирæ азты скъолайы нæ уыд санузелтæ дæр. Бындурон цалцæгмæ бавнæлдтой мартъийы кæрон. Цыбыр рæстæгмæ баивтой хауæццæгтæ æмбырдгæнæн хæтæлтæ, ивддзинæдтæ бахастой кабинетты арæзтадмæ дæр. Ныртæккæ объекты цæуынц мидæггаг куыстытæ.
Ам ахуыр кæны 130 сывæллоны. Рæстæгмæ сæ раивтой Елхотмæ. Специалистты ныхæстæм гæсгæ, сывæллæттæ сæхи скъоламæ раздæхдзысты фыццæгæм сентябрмæ. Уыцы рæстæгмæ ам сæвæрдзысты ног мебель, нырыккон ифтонггæрзтæ. Парти «Иугонд Уæрæсе»-йы минæвæрттæ адæмон программæйы фæлгæты сбæрæг кодтой куыстыты цыд. Цы федтой, уымæй разыйæ баззадысты.
Ахæм мониторингтæ «Иугонд Уæрæсе» аразы æппынæдзух. Бæрæг кæнынц социалон нысаниуæг кæмæн ис, ахæм объектты арæзтад æмæ бындурон цалцæджы цыд. Уый партийы адæмон программæмæ цы объекттæ бахастой, уыдон.
