Люсине Григорян у Уӕрӕсейы ерысты фӕлтӕрдджындӕр архайджытӕй иу. Фехтованийӕ чызг архайы 17 азмæ хæстæг. Спорты дæсны арæх свæййы уæлахиздзау. Фарон дæр рамбылдта сыгъзæрин майдан. Ныр дæр æй ныфс ис, раззагдæр суæвынæй.
Мæхи бирæ рæстæг цæттæ кодтон. Зæгъæн ис, æмæ æппынæдзух. Мæ тренерты фæрцы мæ ныфс ис, раззагдæр кæй суыдзынæн, уымæй. Уыимæ ма мын æххуыс сты мæ фарсмæ цы адæм ис, уыдон иууылдæр. Куы нæ ма разæнгард кæниккой, уæд мæ къухы æнтыстдзинæдтæ не фтид.
Кæд йæ къух хорз уавæры нæй, уæддæр Люсине æрбацыд фехтованимæ. Йæхæдæг куыд зæгъы, афтæмæй йын райдианы зын уыд, ныфс ын нæ фаг кодта. Рæстæгимæ спорты фæрцы сси разæнгарддæр, æндæр адæмимæ ныхас кæнынмæ йæхи раргом кодта.
Сæ æнæниздзинад хъыгдард кæмæн у, ахæм адæм дæр ис. Уый зонын хъæуы, уымæй æфсæрмы кæнын нæ хъæуы. Уæлдайдæр кæд цудыд æнæниздзинадимæ фæсивæдæн ахæм хорз фадат ис хи равдисынæн, уæд. Уый тынг хорз у. Æвæццæгæн, ацы спорты хуызмæ куы нæ æрбацыдаин æмæ дзы мæхи куы нæ равдыстаин, уæд мæхи афтæ нæ раргом кодтаин.
Ноджы ма иу архайӕг — Илья Чернышов Новосибирскӕй. Фондз азмӕ фехтованийы дыууӕ хатты сси Уӕрӕсейы ерысты уӕлахиздзау 17 азы онг кары юниорты ‘хсӕн. Ацы аз турнирмӕ уæлдай бæстонæй цæттæ кодта: стартæй гыццыл раздæр спортсмен æрбаздӕхт Дунейы Кубокы къӕпхӕнӕй Таиландæй.
Бакусдзынæн дистанцийыл, уый фæстæ мысаныл, сахуыр кæндзынæн раст архайын. Фæсивæдæн сæ фылдæримæ зонгæ дæн. Æппындæр нæ тыхсын. Фыццæгты мын иу зын уыд, фæлæ ныртæккæ мæхиуыл æууæндын.
Дзӕуджыхъӕумӕ ссыдысты 70 спортсмены онг бӕстӕйы алы регионтӕй. Уӕрӕсейы ерыстӕ Цӕгат Ирыстоны сӕйраг горӕты ныридæгæн цæуынц æвдæм хатт.
Турнир нæ республикæйы кæй цæуы, уый хорз хъуыды у. Нæ спортсментæн хорз фадат у, республикæйы уæвгæйæ Уæрæсейы ерысты бацархайынæн. Афæдзæй-афæдзмæ архайджыты нымæц фылдæр кæны. Ам сæ зæрдæмæ цæуы, куыд сæ суазæг кæнынц, уымæй разыйæ баззайынц.
Фехтовани республикӕйы æнтыстджынæй парахат кæны. Фæлтæрдджын тренерты разамындæй кусы олимпаг резервы сывæллæтты сæрмагонд скъола. Бæстон архайд дæтты хорз фæстиуæг. Цæгат Ирыстоны арæхдæр фæзынынц æрыгон курдиатджын спортсментæ. Сæ рæзынæн æппæт уавæртæ дæр конд цæуы.
Фехтованийы федераци æмæ физкультурæйы министрад иумæйагæй архайынц, фæнды нæ, цæмæй ацы спорты хуыз нæ регионы парахат кæна, цæмæй нæ республикæйы номæй спортсментæ æппæтуæрæсеон æмæ æппæтдунеон къæпхæнтыл сæхи ‘вдисой.
Фехтованийæ Уӕрӕсейы ерысты архайынц 23 азы онг кары лӕппутӕ ӕмӕ чызджытӕ. Спортивон мадзал ахӕсдзæн 12-æм сентябрьмӕ.
