Дзæуджыхъæуы 33-æм скъолайы рауагъдонтæй Сæрмагонд æфсæддон операцийы чи фæмард, уыдонæн абон ахуыргæнæндоны байгом кодтой мемориалон фæйнæджытæ

Дзæуджыхъæуы 33-æм скъолайы рауагъдонтæй Сæрмагонд æфсæддон операцийы чи фæмард, уыдонæн абон ахуыргæнæндоны байгом кодтой мемориалон фæйнæджытæ. Алыккаты – Хъæстуаты Георгий æмæ Æлборты Шалва фарон фæмардысты. Номарæн мадзалы архайдтой æфсæддонты хиуæттæ æмæ хæстæджытæ, сæ ахуыргæнджытæ æмæ æмкъласонтæ. Минут æдзæмæй алæугæйæ ссардтой æдзард лæппуты рухс нæмттæ. Хъæстуаты Георгийыл цыд 25 азы. Уыд тынг цымыдис æмæ цæрдæг лæппу, хорз ахуыр кодта, зæгъынц йæ ахуыргæнджытæ. Мобилизацигонд æрцыд 2022-æм азы, октябры. Йæ æхсардзинады тыххæй хорзæхгонд у хæрзиуджытæй, се ‘хсæн «Ирыстоны намыс»-ы майдан дæр. Георгий фæмард тохы быдыры. Президенты указмæ гæсгæ, йæ æхсардзинады тыххæй хорзæхгонд æрцыд Хъæбатырдзинады орденæй йæ амæлæты фæстæ. Æлборты Шалва – æфсæддон цауты ветеран, Жуковы æмæ “Æфсæддон сгуыхтдзинæдты” майданты кавалер хъæбатырæй фæмард Донецкы адæмон республикæйы горæт Авдеевкæйы цы тох цыд, уым. Скъолайы рауагъдонты, хъæбатыр æфсæддонты нæмттæ рох нæ уыдзысты чи сæ зыдта, уыдонæй.