Хъæдын пъолтæ æмæ чъизи донæй дзаг ныккæнд. Ахæм уавæртæ уыд 42-æм скъолайы. Арæзт æрцыд 1986-æм азы. Бындуронæй цалцæггонд никуы уыд. Бынтон заууат уавæры уыдысты коммуникацитæ. Хъармгæнæн хызæгтæ куыстой къуылымпытимæ, зымæджы кабинетты уыд уазал. Уæлхæдзар дзы 10 азы размæ сног кодтой, фæлæ йæ хæрзхъæддзинадмæ сæвзæрд фарстатæ.
Æрвылбон объекты архайы 30 адæймаджы. Куыстытæ райдыдтой 10-æм апрелы. Ныридæгæн зæронд хæйттæ ныппырх кодтой, къултæ ныххафтой æмæ сæ ногæй сраст кодтой. Тагъд сæ райдайдзысты ахорын. Ныр ауайæнты зæронд фæйнæджыты бæсты сæвæрдтой плиткæ. Кълæсты уыдзæн фидар линолеум. Нывыл кæнынц цартæ дæр.
Электрон тых, хъармгæнæн æмæ хауæццæгтæ æмбырдгæнæн хызæгтæ ныридæгæн цæттæ сты. Ныр алы кабинеты дæр сæвæрдзысты раковинæ, æдæппæтæй уыдзысты 60. Гимнастикæйы, стыр æмæ чысы спортивон залтæ дæр сæ хуыз скалдтой. Рудзгуытæ бахгæндзыты хызтæй, пъолыл байтаудзысты сæрмагонд гарз. Æдасдзинады тыххæй къултыл бакæндзысты фæлмæн маттæ.
Хæрæндоны хæтæлтæ баихсыдысты. Арæх иу атыдтой. Æмбæлгæ кусæнгæрзты кæцыдæр хайæ сæ сифтонг кодтой 2010 азы. Хæрæндоны ма хъæуы хъæугæ дзауматæ равæрын. Актон зал дæр саив кæндзысты. Къул дзы самайдзысты ногæй. Зæронд æнцонархайд нæ уыд. Ныр залмæ бахизæн уыдзæн уæрæх асинтыл. Цар дæр фæивтой.
Бындурон цалцæг ахæсдзæн дыууæ азы. Æххæст æй кæнынц “Ахуырады райрæзт”-ы федералон программæмæ гæсгæ. Скъолайы фæзуат у дæс мин квадратон метрæй фылдæр. Фыццаг къæпхæны, августы кæронмæ фæнд кæнынц бæстыхайы фылдæр хай сног кæнын, базилдзысты йын йæ æддаг бакастмæ дæр. Уæлдай æргом здахынц куыстыты хæрзхъæддзинадмæ.
Сентябры райдайдзысты скъолайы иннæ хай цалцæг кæнын. 1 мин 600 скъоладзауы рæстæгмæ ахуыр кæндзысты дыууæ фæлтæрæй. Æмткæй ацы аз Дзæуджыхъæуы сног кæндзысты 10 ахуырадон кусæндоны.
