Дзæуджыхъæуы ацыд поэт, журналист Цомайты Ростиславы мысæн изæр

Наукон чиныгдоны æрымысыдысты Цомайты Ростиславы рухс ном: Уæрæсейы журналистты æмæ фысджыты цæдисты уæнг, республикæйы культурæйы сгуыхт кусæг. Литературон редактор æмæ чиныгаразæджы тыххæй сæ мысинæгтæ загътой йе ‘мсис хæлæрттæ. Сæрмагондæй мысæн изæрмæ бацæттæ кодтой чингуыты равдыст. Уазджытæн бакастысты поэты фыст æмдзæвгæ. Йæ уацмысты ‘хсæн зынгæ бынат ахстой сабидуг æмæ ныййарæджы тыххæй мысинæгтæ. Ирдæй æвдыста хъæу æмæ горæты ахастытæ дæр. Райгуырæн зæхх, уарзт, æмгарад æмæ æвзонгады кой кодта бæрзонд, сыгъдæг рæнхъытæй. Цомайы-фырты сфæлдыстад хæдбындур у. Йæ райгуырæн Уæлладжыры цы рæсугъд ирон æвзаг базыдта, уый литературæмæ дæр æрбахаста. Хистæртæй цы бирæ таурæгътæ, аргъæуттæ, кадджытæ хъуыста, уыдонæй пайда кодта йæ уацмысты. Фыццаг ахуыры мидæг Ростислав уыди нывгæнæг. Уый фæрцы поэзимæ диссаджы æнкъарæнтæ хаста.
Бирæ рæстæджы Цомайты Ростислав куыста “Рæстдзинад”-ы сæйраг редакторы хæдивæгæй. Куыд журналист, афтæ йæ алы æрмæг — фæлгонцгонд. Ахæм сæргонд-иу сарæзта æрмæгæн æмæ йæ газеткæсæджы цæст æнæ ацахсгæ нæ фæуыдаид.