Дзæуджыхъæуы байгом æппæтуæрæсеон культурон-спортивон фестиваль «Мирный Кавказ». Сарæзтой йæ 10-æм хатт. Цæгат æмæ Хуссар федералон зылдты спортсментæ æртæ боны дæргъы сæ арæхстдзинад æвдисздысты спорты 11 хуызæй. Программæйы – джиу-джитсу, æфсæддон къуххæст, тайаг бокс, самбо æмæ æндæртæ.
Абон ерыстæ кадджын уавæры байгом кодтой спорты галуан «Манеж»-ы. Сарæзтой концертон программæ дæр. Архайджытæн æмæ уазджытæн арфæйы ныхæстæ загъта республикæйы физкультурæ æмæ спорты министры хæстæ рæстæгмæ æххæстгæнæг Кочиты Сослан. Культурон-спортивон фестиваль аразджытæ сты нæ республикæйы спорты министрад æмæ Уæрсейы хæстон аивæдты цæдисы хайад Цæгат Ирыстоны.
Йæ сæйраг нысан – Уæрæсейы регионты ‘хсæн культурон бастдзинад фидардæр кæнын. Хæлардзинады уидæгтæ ауадзынӕн ерыстæ сты хорз бындур. Бафтаудзыстæм ма уый, æмæ æдæппæтæй фестивалы 1 000 спортсменæй фылдæр кæй архайы.
