Нæ республикæйы абон байгом æппæтуæрæсеон культурон-спортивон фестиваль «Мирный Кавказ». Сарæзтой йæ 9-æм хатт. Цæгат æмæ Хуссар федералон зылдты спортсментæ дыууæ боны дæргъы сæ арæхстдзинад æвдисздысты 10 спорты хуызæй. Абон ерыстæ кадджын уавæры байгом кодтой спорты галуан «Манеж»-ы.
Рашид Тазовыл 9 азы цæуы. 4 азы дæргъы архайы кикбоксингæй. Ныридæгæн йæ къухы бафтыд бирæ ерысты бацархайын. Абон йæ арæхстдзинад æвдисы æппæтуæрæсеон культурон-спортивон фестиваль «Мирный Кавказ»-ы.
Рашид Тазов, фестивалы архайæг: «Æз дæн Кæсæг-Балхъарæй. Цы ерысты архайдтон, уыдонæн сæ фылдæры бацахстон фыццаг бынæттæ. Абоны фестиваль мæ зæрдæмæ тынг цæуы. Мæ ныхмæллæууæгыл фæуæлахиз уæвын мæ къухы бафтыд. Иннæ аз дæр дзы архайдзынæн».
Кикбоксингæй йеддæмæ ма фестивалы архайджытæ ерыс кæнынц бирæ æндæр спорты хуызты: тайский бокс, джиу-джитсу, карате, тхэкводно, ситорю, æфсæддон æрмхæст æмæ айкидо. Айкидойæ сæхи равдыстой нæ республикæйы иугонд командæйы уæнгтæ.
Елизавета Журкина, фестивалы архайæг: «Ацы ерысты фыццаг хатт архайын. Уымæ гæсгæ тын тыхстæн, куыд равдисдзынæн мæхи, уый фæдыл. Фыццаг бынат бацахсын мын бантыст æмæ мын тынг æхсызгон у».
Александр Финаев, фестивалы архайæг: «Айкидо мæ зæрдæмæ тынг цæуы. Уæлахиз нæ фæдæн, фæлæ кæй бацархайдтон, уымæй тынг разы дæн».
Ерыстæ кадджын уавæры байгом сты спорты галуан «Манеж»-ы. Фестивалы архайджытæ æмæ йæ уазджытæн сарæзтой концертон программæ дæр. Уыимæ ма, Æрыдоны аивæдты скъолайы ахуырдзауты нывты равдыст дæр ерысты уазджыты бон фенын уыд. Сæ нывты равдыстой, цы спорты хуыз сæ зæрдæмæ фылдæр цæуы. Хъаматæй чи хæцы, уыцы спортсментæ та равдыстой ацы спорты хуызæй куыд архайын хъæуы, уый.
Дзиуаты Марат, фестивалы архайæг: «Фестивалы архайджытæ æмæ уазджытæн равдыстам нæ спорты хуыз. Куыд нæ фæндыд, бынтон афтæ нын нæ рауад нæ равдыст. Фæнды нæ, цæмæй ацы спорты хуызæй фылдæр сабитæ архайой».
Фестиваль арæзт у 9-æм хатт. Сси æрвылазон. Йæ архайджытæ сты 18 азы онг спортсментæ куыд нæхи республикæйæ, афтæ сыхаг республикæтæ æмæ Уæрæсейы иннæ регионтæй: Кæсæг- Балхъар, Цæцæн, Стъарапол æмæ бирæ æндæртæ. Ерыстæ арæзт сты Уæрæсейы спорты министрад, нæ республикæйы спорты министрад æмæ Уæрсейы хæстон аивæдты цæдисы хайад Цæгат Ирыстоны. Фестивалæн йæ сæйраг нысан у- Уæрæсейы регионты ‘хсæн культурон æмæ спортивон бастдзинад фидардæр кæнын.
Æдæппæтæй фестивалы архайдзысты минмæ æввахс спортсмены.
Хуасдзауты Алинæ
