Дзæуджыхъæуы базарадон-экономикон техникумы ацы бонты ацыдысты дæсныйад æвдисæн ахуыртæ. Ирон чъиритæ цæттæ кæныны сусæгдзинæдтæ специалисттæ амыдтой Мурманскы, Кемеровойы, Краноярскы облæсты минæвæрттæн. Ахуырты тыххæй бæлвырддæр радзурдзæн нæ уацхæссæг Пелиты Сабинæ.
Ирон чъиритæ саразыны сусæгдзинæдтæ базонынмӕ Раиса Челенбаева ссыд Красноярскы крайæ. Бирæ азты дæргъы фыцы ирон чъиритæ, фæлæ ацы хъуыддаджы цавæрдӕр фæзилæнтæ кæронмæ нæ зыдта. Йæ ныхæстæм гæсгæ, ам ахсджиаг у алцыдæр. Фыццаджыдæр зæрдæйы ахаст.
Раиса Челенбаева, Красноярскы крайы арæзтадон техникумы педагог: «Радзырдтой нын, уæдæ нын ӕвдисгӕ дӕр бакодтой, куыд хъæуы чъиритæ раст кӕнын. Стыр бузныг сӕ стæм. Ацы зонындзинæдтæ мæ тынг бахъæудзысты».
Эля Гайнетдилова та ссыд Татарстанæй. Куыд зæгъы, афтæмæй ирон чъиритæ йæ уарзондæр хæринæгтæй иу у. Бирæ азты архайдта Вордскиллсы чемпионаты. Дæсныйад æвдисæн ахуыртæм фыццаг хатт куы бахаудта, уæд йæ фæлтæрддзинад фæуæлдæр кодта дæснытæм кæсгæйæ.
Эля Гейнетдилова, Татарстаны базарадон техникумы сæрмагонд дисциплинæты педагог: «Махмæ Татарстаны хыссæ гыццыл æндæр хуызон аразгæ у. Ирон хæрзад кæрдзынтæ сцӕттӕ кӕнын æнцон нæу. Цы нын бацамыдтой, уымæй тынг разы дæн. Цæгат Ирыстонмæ ма ссæудзæн ноджыдæр».
Нæ бæстæйы алы къуымтæй ахуырдзаутæ чъиритæ цæттæ кæнын сæхи ахуыр кодтой æнæрлæугæйæ. Йæ гаххæ у алыхуызон: цыхт, картоф, нас æмæ æндæртæ. Специалистты ныхæстæм гæсгæ, ацы аз æркасты архайдзысты тыхджын специалисттæ.
Дæсныйад æвдисæн ахуырты рæстæг Цæгат Ирыстоны сцæттæ кодтой сæдæгай чъиритæ. Уыцы рæстæгмæ цымыдисæй базыдтой ирон адæмы традицитæ æмæ культурæ. Ныр ног зонындзинæдтимæ афæндараст сты сæ райгуырæн бæстæмæ. Ам цы базыдтой, уый сæ кæстæр фæлтæрæн нæ бавгъау кæндзысты.
