Дзæуджыхъæуы бирæфатерон хæдзæрттæй иуы уалдзæджы лифтытæ ивын райдыдтой. Цæрджытæ цин кæнынмæ фесты, уæдæ цы, фæлæ сын бирæ нæ ахста. Хъуыддаг ныффæстиат. Цавæр зындзинæдтимæ æмбæлынц æмæ цы дзуапп райстой бæрнон куыстуатæй? Ме ‘мкусджытæ радзурдзысты.
Доваторы уынгыл 21-æм хæдзары кæрты хистæрты бадгæ арæх нæ фендзынæ. Лифт нæ кусы æмæ сæ уæлдай хатт бынмæ æрхизын никæй фæнды. Челæхсаты Ларисæ 9-æм уæладзыгыл цæры. Сылгоймаг 3-æм къорды инвалид у: йæ къæхтæ, йе ‘рхæджытæ риссынц.
192 фатеры, 6 подъезды æмæ тынг бирæ карджын адæймæгтæ. 7-æм уæладзыгыл цæры Хацырты Арчил. Бæргæ йæ фæфæнды сыхæгтимæ аныхæстæ кæнын, фæлæ йæ къæхтæ риссынц. Къæбулты Любовь дæр афтæ. Æгкацаты Людмилæмæ сыхæгтæ фæкастысты æмæ æрхызт. Æмæ ахæм дæнцæгтæ — бирæ. Бирæсывæллонджын бинонтæн дæр зын у.
Лифттæ нæ кусынц майы райдианæй. Раивинаг уыдысты, уый бæлвырд у. Фæлæ уæддæр куыстой, æмæ дзы ныр уыдон дæр куы нал сты. Ныр къуырийы дæргъы, цæрджыты ныхасмæ гæсгæ, куыстытæ лæууынц. Кусджытæ æрмæг подъездты ныууагътой æмæ кæд сцæттæ уыдзысты лифттæ, уый нæ зонынц. Уавæрæй бафарстам бындурон цалцæджы республикон фонды минæвæртты.
Специалисттæ зæрдæ æвæрынц, августы 3-аг декадæйы кæ скусдзысты лифттæ. Уыцы рæстæгмæ бынатмæ ногæй æрбацæуыны курдиатимæ нæм фæсидтысты цæрджытæ. Фæнды сæ, куы ‘рбацæуæм, уæд ног кусгæ лифттæ куы ‘рбаййафиккам, уый.
