Дзæуджыхъæуы Гергиты Валерийы номыл аивæдты колледжы ацы аз бæрæг кæны 80 азы юбилей. Кадджын бæрæгбоны фæлгæты дзы абон арæзт æрцыд адæмон инструменттыл цæгъдынæй фестиваль. Æрыгон студенттæ сæ курдиат æнæбавгъаугæнгæйæ адæмы зæрдæтæ бахъæлдзæг кодтой. Фестивальмæ саккаг кодтой бирæ адæм. Уыд дзы нæ уацхæссæг дæр. Бакæсæм ын йе рмæгмæ!
Гергиты Валерий, Сохиты Тугъан – абон ацы Ирыстоны гуырдты нæмттæ æппæтдунейыл дæр зындгонд сты. Сæ сфæлдыстадон фæндаг райдыдта Дзæуджыхъæуы музыкалон училищæйы. Ацы аз сын у юбилеон. Æххæст сыл кæны 80 азы. Уый кадæн дзы йæ тæмæны бацыд адæмон инструменттыл цæгъдынæй фестиваль.
Сæ арæхстдзинад сценæйыл æвдыстой куыд раздæры рауагъдонтæ, афтæ алы къордты студенттæ дæр. Цъагътой адæмон инструменттыл. Æдæппæтæй музыканттæ бацæттæ кодтой 15 номыры. Куыд зæгъынц, афтæмæй сæхи бæстонæй цæттæ кодтой. Сæ цард æнæ музыкæйæ уынгæ дæр нæ кæнынц.
Фестивалы архайджытæ æрмæст адæмон музыкалон уацмыстæ нæ кодтой, фæлæ ма дунеон композиторты куыстытæ дæр. Колледжы ахуырдзаутæ куыд зæгъынц афтæмæй ацы бон æцæг бæрæгбон у.
Райсом Дзæуджыхъæуы аивæдты колледжы цæудзæн концерты дыккаг хай. Фæстивалы кæронбæттæны схорзæхджын кæндзысты хуыздæр архайджыты.
