Хъæугæ специалисттæ бацæттæ кæнын, сфæлдыстадон бастдзинады гæнæнтæ уæрæхдæр аразын. Астæуккаг профессионалон ахуырады системæйы педагогон кусджыты æппæтуæрæсеон конкурс «Мастер года» æрæджы ацыд Хуссар федералон зылды. Абон та Дзæуджыхъæуы кадджын уавæры ацыд тырысайы эстафетæйы мадзал. Бæлвырддæр радзурдзæн нæ уацхæссæг.
Фыццаг медицинон æххуыс бакæнын, бæлас раст афадын, хæрзад хæринаг ӕрцӕттӕ кӕнын, поездты конструкцитæ æмбырд кæнын. Ацы æмæ æндæр цымыдисаг хъуыддæгтыл сахуыр кæныны фадат уыд Цæгат Ирыстоны паддзахадон университеты кæрты. 20 презентцион фæзæй фылдæр равæрдтой уынджы. Алы фæзы цур дæр фенæн уыд бирæ адæм. Алчидæр сæ архайдта хи къухтæй æлыгæй дзаума саразын, кæнæ хæринаг сцæттæ кæнын. Астæуккаг профессионалон ахуырады ахуыргæнджытæ æмæ студенттæ æхсызгонæй дзурынц алы фæзилæны тыххæй дæр. Дзуæппытæ дæттынц уазджыты фæрстытæн. Абон ма конкурсы фæлгæты сарæзтой флешмоб æмæ бæрæгбоны концерт. Кадджын мадзалы архайдтой Цæгат Кавказы республикæты минæвæрттæ.
Се ‘хсæн ахуырадон дисциплинæты æмæ профессионалон модулты ахуыргæнджытæ, кондады ахуырады дæснытæ, Уæрæсейы алы регионтæй дæсныйадæвдисæн практикæты специалисттæ.
Конкурс аразынц сæрмагонд федералон проектмæ гæсгæ. Йæ сæйраг нысан – астæуккаг профессионалон ауырады системæйы хъомыс фæуæлдæр кæнын, бакусын кадрты райрæзтыл, сфæлдыстадон бастдзинад апарахат кæнын, кæрæдзийы ‘хсæн фæлтæрддзинад æмæ хъæппæристæй хай кæнын. Мадзаларазджытæ — Уæрæсейы рухстауынады министрад, рухстауыны паддзахадон университет æмæ ахуырады æппæтуæрæсеон профцæдис.
Бæстæйы 89 регионы ныртæккæ кæронмæ фæхæццæ кæны æвзарæн къæпхæн. Æркасты финал ацæудзæн Тулæйы облæсты 28-æм сентябрæй 2-æм октябрьмæ. Уæлахиздзау райсдзæн 200 мин сомы.
