Дзæуджыхъæуы, Леваневскийы номыл уынджы 275-æм æмæ 277-æм хæдзæртты кæртыты цæуы рацарæзт

Дзæуджыхъæуы, Леваневскийы номыл уынджы 275-æм æмæ 277-æм хæдзæртты кæртыты цæуы рацарæзт. Цалдæр боны размæ систой асфальты уæлцъар, баивтой бардюртæ. Фæндаджы уæрхыл бафтыдтой 60 сантиметры. Дарддæр акалдтой хуыр æмæ сæмраст кæндзысты æмвæзад. Уый фæстæ та райдайдзысты асфальт æвæрын. Кæрты фæзуат у 2 мин квадратон метры. Хæрзвадат домæнтæм гæсгæ, ам сæвæрдзысты бандæттæ, бырондæттæ, подъездтæм бацæуæнты — рухсгæнæнтæ. Ахæм цалцæг райдыдта, хæдзæртты цæрджытæ республикæйы сæргълæууæг Сергей Меняйломæ комкоммæ эфиры куы фæсидтысты, уый фæстæ. Контрактмæ гæсгæ, куыстытæ хъуамæ фæуой ацы азы кæронмæ. Фæлæ подрядон организаци рæвдз архайы æмæ, гæнæн ис, сентябрмæ кæрт йæ хуыз скалдзæн.