Цавæр сæйдтытæ ис ныртæккæ информацион тыгъдады? Куыд ис æцæг хабæрттæ фейктæй раиртасӕн, æмæ семæ баст фæлитой митæ ма ‘руадзын? Дзæуджыхъæуы райдыдта форум-интенсив “СМИ – МЫ”, зæгъгæ.
Скъоладзаутæ, студенттæ æмæ хъыгдард æнæниздзинадимæ сывæллæттæн аразынц дæсныйадæвдисæн ахуыртæ æмæ кæсынц лекцитæ республикæйы раззагдæр журналисттæ, ахуыргæндтæ æмæ ахуыргæнджытæ. Программæ у хъæздыг. Архайджытæн фадат уыдзæн сæхи телеуынынады амонæг, продюсер æмæ къамисæджы дæсныйæдты бафæлварын. Сæ фæрстытæн дæр сын специалисттæ дзуæппытæ ратдзысты. Сæйрагдæр та уый у, æмæ сæ бон уыдзæн медиатыгъдады цымыдисагдæр цы здæхт у, уый бамбарын æмæ фидæны дæсныйад равзарын. Мадзалы кæронбæттæн алы архайæгæн ратдзысты сертификат. Æппæты æнтыстджындæрмæ та æнхъæлмæ кæсы сæрмагонд лæвар – энциклопеди “Мой Иристон”. Форум у дзыллон информацион фæрæзтæн æххуыс æмæ рæзты егъау паддзахадон программæйы хай. Арæзт цæуы дыккæгæм хатт.
