Цæгат Ирыстоны ахуырад æмæ наукæйы министрад æмæ сывæллæтты республикон аивæдты галуаны хъæппæрисæй ныр 19 хатт арæзт цæуы наукон-иртасæн конференци «Ступень в науку», зæгъгæ. Ерысы сæйраг нысан — раргом кæнын курдиатджын сывæллæтты. Æмæ сын æнтысы, афæдзæй-афæдзмæ архайджыты нымæц рæзы. Уæдæ сæ куыстытæ та кæнынц хæрзхъæддæр. Аргъ сын кæнынц дæсны эксперттæ. Наукон иртасæн конкурсы кæронбæттæн уыдзæн 8 февралы.
Адæмон кадæггæнджыты тыххæй бæлвырддæр базонын æмæ фæсивæды ‘хсæн уыцы зонындзинæдтæ апарахат кæнын, уыимæ сын сæ монон культурæйыл хуыздæрӕй сахадыны нысанимæ Æлборты Давид йæ ахуыргæнæгимæ биноныгæй бацæттæ кодта наукон куыст. Ныр ын фадат фæцис сæ иумæйаг архайды хатдзӕгтӕ жюрийы уæнгты размæ рахæссынæн. Конкурсы ныр 8-æм хатт архайы. Иу хаттӕй иннӕ хаттмӕ æнтыстджындæр кæны. Ацы хатт дæр дзы ныфс ис республикон къæпхæны фæстиуæг — Мæскуымæ балц кæй рауайдзæн.
Дзæуджыхъæуы 38-æм скъола æрвылаз дæр æнтыстджынæй бацархайы ацы мадзалы. Ахуыргæнæндоны ирондзинад бæрзонд æвæрд у. Се ‘ргом ма здахынц наукæмæ дæр. Сæ темæты кæддæриддæр ирдæй фæзыны национ тæваг. Æрвылаз бацæттæ кæнынц пайдаджын æмæ цымыдисаг куыстытæ.
Цымыдисаг æмæ ахсджиаг нысанимæ ацы наукон-иртасæн конференцийы дыккаг хатт архайы Дзебысаты Орнеллæ дæр. Йæ фидæны дæсныйад журналистикæимæ кæй бæтты, уыимæ йын литерæтурæ хæстæгдæр кæй у, уымæ гæсгæ, йæхи фæлвары литерæтурæзонынады хайады. Йæ наукон разамонæгимæ бацæттæ кодта темæ «Средства создания образа подростка с ограниченными возможностями в современной литературе». Орнеллæ йæхæдæг куыд зæгъы, афтæмæй, йын бантыст ацы хъуыды райхалын. Уæвгæ, ныр конференцийы архайы дыккаг хатт — ӕмӕ æнтыстджынæй. Уæдæ ацы мадзал ахсджиаг кæй у, уый дæр бæлвырд бамбæрста.
Конкурс Цæгат Ирыстоны ахуырад æмæ наукæйы министрад æмæ сывæллæтты республикон аивæдты галуаны хъæппæрисæй ныр 19 хатт арæзт цæуы. Афæдзæй-афæдзмæ конкурсы бацархайыны фæтк ивы. 23 секцийы — гуманитарон, математикон æмæ æндæр здæхтыты. Архайджыты адих кодтой сæ кармæ гæсгæ. 1-æй 11-æм къласы онг ахуырдзаутæ. Ивы архайджыты нымæц дæр. Ацы хатт сты 250 адæймагмæ ввахс. Алы архайæгдæр райсдзæн сæрмагонд æвдисæндар. Уæлахиздзаутæ та хорзæхджынгонд æрцæудзысты кады гæххæтытæ æмæ майдантæй. Ерысы сæйраг нысан — раргом кæнын курдиатджын сывæллæтты. Аргъ сын кæнынц дæсны эксперттæ.
Наукон иртасæн конкурсы кæронбæттæн уыдзæн 8 февралы. Уæд сбæлвырд уыдзæн, Ирыстоны кад уæлдæр кæныны бæрнон хæс кæмæ кæсы, уыдоны номхыгъд. Ныр та уал конференцийы архайджытæ дарддæр чи хуыздæрыл архайгæйæ размæ тырндзысты. Дисы æфтаудзысты жюрийы уæнгты. Уæлахиздзаутæ дарддæр æнтыстдзинæдты фæдыл араст уыдзысты Мæскуымæ.
