Дзæуджыхъæуы Социалон лæггæдты комплексон центры бындурыл байгом Бинонты бирæвæрсыг лæггæдты центр. Бæстыхай
цæттæ кæнын райдыдтой фарон. Ныртæккæ ифтонггонд у æппæт хъæугæ кусæнгæрзтæй. Æмбæлгæ уавæртæ дзы сарæзтой æгас бинонтæн. Ам сын бынаты иуварс кæндзысты сæ фарстатæ. Кадджын мадзалы уыдысты хицауады уæнгтæ, дзуапдæттæг ведомствоты минæвæрттæ. Ног кусæндоны гæнæнты тыххæй бæлвырддæр радзурдзæн Гугкаты Иринæ.
Сабийы скъоламæ бацæттæ кæнын, англисаг æвзагыл æй ахуыр кæнын, психологон æххуыс райсын æмæ ма хиирхæфсæн мадзæлтты бацархайын дæр. Æппæт ацы гæнæнтæ ныр ис Дзæуджыхъæуы Промылшленнон районы бинонты бирæвæрсыг лæггæдты центры. Кусæндон абон кадджын уавæры байгом. Фыццаг лæггæдтæ исæг Дзæгъиаты Стеллæ тынг æхсызгонæй сæмбæлд ацы цауыл. Ныр центры гæнæнтæй пада кæндзæн æппынæдзух.
Центры ис цалдæр хайады. Фыццаг хатт чи æрбацæуы, уыдонæн сæрмагондæй радзурынц сæ бинонтæн цы æххуысы гæнæтæ æмбæлы, уыдоны тыххæй. Ис дзы æвæстиаты психологон æххуысы хайад дæр. Ам æмбæлгæ лæггад бакæныдзысты царды зын уавæрты чи бахауд, уыцы бинонтæн. Суанг ма специалистмæ хæдзармæ бадзурæн дæр ис. Центры ма адæмæн æххуыс кæндзысты социалон лæггæдтæй спайда кæныны хъуыддаджы дæр. Курдиат бадæттынæй райдай æмæ юридикон æххуысæй фæуы.
Центры бæстыхайы цалцæггæнæн куыстытæ райдыдтой фарон, декабры. Баивтой дзы хæтæлтæ, сног кодтой техникон ифтонггæрзтæ. Сарæзтой дзы уавæртæ се ‘нæниздзинад хъыгдæрд кæмæн у, уыдонæн дæр. Уыцы иу рæстæг дзы лæггæдтæ исын сæ бон у 13 адæймагæн. Сабитæн та дзы фæзынд агъуыст хъазæнтимæ. Уым сæ рæстæг хъæлдзæгæй кæй æрвитдзысты, уый у æнæмæнг.
2023-æм аз республикæйы фæллой æмæ социалон рæзты министрад фæуæлахиз сæрмагонд конкурсы. Уый руаджы республикæйы байгом ныр дыккаг центр бинонтæн кæм лæггад кæнынц, ахæм. Ацы куыст профилон министрад кæндзæн дарддæр дæр.
